شام میں انتخابات میں 4 سال لگ سکتے ہیں، ابو محمد الجولانی

ابو محمد الجولانی نے اسلامی جمہوریہ ایران پر علاقائی معاملات میں مداخلت کا الزام لگایا۔ انہوں نے کہا کہ مجھے امید ہے کہ ایران خطے میں مداخلت کے حوالے سے اپنے کردار کو تبدیل کرے گا۔ اس کے لئے ضروری ہے کہ ایران اپنی پالیسیوں پر نظرثانی کرے۔ ایک وسیع بلاک خطے میں ایران کا مثبت کردار چاہتا ہے۔ شام میں باغیوں کے ٹولے کے سربراہ نے کہا کہ ہم سب کے ساتھ مناسب تعلقات برقرار رکھنا چاہتے ہیں۔ ماضی میں لگے ہوئے زخموں کے باوجود ہم نے ایرانی ہیڈکوارٹرز کے ساتھ تعاون کیا۔ ہمیں ایران سے مثبت بیانات کی توقع تھی۔ ایران کو شامی عوام کے ساتھ کھڑا ہونا چاہئے تھا۔ ابو محمد الجولانی نے کہا کہ روس دنیا کا دوسرا طاقتور ترین ملک ہے۔ شام کے روس کے ساتھ اسٹریٹجک مفادات ہیں۔ ہم نہیں چاہتے کہ روس، شام سے اس طرح جائے جو اس کے شایان شان نہ ہو۔ امریکہ کے حوالے سے انہوں نے کہا کہ ہمیں امید ہے کہ ڈونلڈ ٹرامپ شام سے پابندیاں ہٹائیں گے۔ ہم نئی امریکی انتظامیہ سے چاہتے ہیں کہ وہ اپنی پُرانی پالیسیوں کو نہ دہرائے۔

کُردوں کے بارے میں ابو محمد الجولانی نے کہا کہ اس وقت شمال مشرقی شام کے بحران کے حل کے لئے سیرین ڈیموکریٹک فورس (قسد) کے ساتھ مذاکرات کر رہے ہیں۔ شام کو کسی وجہ سے بھی تقسیم یا فیڈرل نظام میں نہیں ڈھلنا چاہئے۔ ہم اس بات کی اجازت بھی نہیں دیں گے کہ PKK ہماری سرزمین سے کسی دوسرے ملک پر حملے کرے۔ کُرد، شام کا جزو لا ینفک ہیں۔ شام کی وزارت دفاع کُرد فورسز کو اپنے ساتھ ضم کرے گی۔