اسلام ٹائمز۔ تحصیل اسمبلی پاراچنار اپر کرم نے اعلان کیا ہے کہ اگر تین روز کے اندر آمد و رفت کے راستے کھول کر محفوظ نہ بنائے گئے تو احتجاجی تحریک شروع کریں گے۔ پاراجنار میں تحصیل اسمبلی کے ہنگامی اجلاس کے بعد پریس کانفرنس سے خطاب کرتے ہوئے تحصیل چیئرمین مولانا مزمل حسین، سپیکر جاوید جان، ویلج چیئرمین ملک سید اصغر، معین حسین، بابو ظاہر، واحد حسین اور چیئرمین سید اخلاق نے کہا کہ طویل عرصے سے مین شاہراہ کی بندش سے اپر کرم کے تمام علاقے بری طرح متاثر ہو گئے ہیں، تیل اور خوراک کے علاوہ ادویات بھی ختم ہو گئی ہیں، وہ اپنے علاقے کے منتخب نمائندے ہیں اور مزید اپنے عوام کے ساتھ اس قسم کا ظلم برداشت نہیں کر سکتے۔
