ہم اسرائیل کیخلاف بھرپور مزاحمت جاری رکھینگے، نبیہ بری

اسلام ٹائمز۔ لبنانی اسپیکر پارلیمنٹ نبیہ بری کی جانب سے تہران میں منعقد ہونے والی بین الاقوامی مکتب نصر اللہ کانفرنس میں ارسال کردہ پیغام آج ایران میں تحریک امل کے نمائندے صلاح فحص نے کانفرنس میں پڑھ کر سنایا۔

اس پیغام میں شہید سید حسن نصر اللہ کو خراج عقیدت پیش کرتے ہوئے نبیہ بری کا کہنا تھا کہ ہمارا اعتماد مزاحمتکاروں کے بازوؤں پر ہے جو ضرور بالضرور فتح حاصل کریں گے۔ انہوں نے لکھا کہ شہید سید حسن نصر اللہ، امام سید موسی صدر کے شاگردوں میں سے ہیں کہ جن کا عقیدہ تھا کہ لبنان دنیا کی تہذیبی ضرورت ہے اور اگر خدا نہ کرے، یہ سقوط کر گیا تو تمام لوگ ستم کا شکار ہو جائیں گے۔ نبیہ بری نے لکھا کہ یہ ملک جس پر ہمیں فخر ہے، تمام فرقوں کے تمام لوگوں کا وطن ہے جو 40 دن سے زائد کے عرصے سے ایک تباہ کن جنگ کا شکار ہے، جس طرح فلسطین اور غزہ کی پٹی میں ہمارے خاندان 13 ماہ سے زائد کے عرصے سے اس کی زد میں ہیں۔ انہوں نے لکھا کہ اس جنگ کا مقصد جنوبی لبنان، بقاع اور بیروت کے جنوبی مضافات کہ جن میں ڈیڑھ ملین سے زائد لوگ آباد ہیں اور ان میں زیادہ تر خواتین، بچے اور بوڑھے شامل ہیں، کو ان کے گھروں سے نکال باہر کرنا اور الگ تھلگ کر دینا ہے۔
  نبیہ بری نے تاکید کی کہ لبنانی حکومت و عوام اقوام متحدہ کی قرارداد 1701 کے فوری نفاذ اور یونیفیل فورسز کے ساتھ ساتھ دریائے لیطانی کے جنوب میں ملکی فوج کی تعیناتی کے لئے جس حد تک تیار و پرعزم ہیں، اسی حد تک، اپنی سرزمین و خودمختاری کے کسی بھی حصے پر اسرائیلی جارحیت کے خلاف مزاحمت پر بھی عزم بالجزم رکھتے ہیں اور جب تک دشمن کی جارحیت کو روکا نہیں جاتا، تب تک سب کچھ  بہادر سورماؤں کے ہاتھ اور عزم کے ساتھ میدان میں باقی رہیگا!

اپنے پیغام کے آخر میں نبیہ بری نے لکھا کہ ہم لبنان کی بے دریغ حمایت اور مدد پر اسلامی جمہوریہ ایران کے رہبر، حکومت و عوام کے شکر گزار ہیں۔۔ وہ مشکل وقت میں ہمارے بھائی اور دوست ہیں اور میں ان کا اور ان تمام حکومتوں کا شکرگزار ہوں جنہوں نے اس مرحلے و مشکل وقت میں لبنانی عوام کا ساتھ دیا۔