سکردو، یونین کونسل اور وارڈ بندیوں میں اضافے کی تجویز

اسلام ٹائمز۔ ڈپٹی کمشنر سکردو کیپٹن (ر) عارف احمد کی زیر صدارت وارڈ بندیوں سے متعلق اجلاس منعقد ہوا۔ جس میں تمام سیاسی پارٹیز کے صدور اور نمائندوں نے شرکت کی۔ اجلاس میں ڈپٹی کمشنر نے الیکشن کمشنر گلگت بلتستان کی جانب سے قائم کردہ کمیٹی جس میں متعلقہ ڈپٹی کمشنر، اسسٹنٹ کمشنر ہیڈکوارٹر اور ڈپٹی ڈائریکٹر ایل جی اینڈ آر ڈی کی رپورٹ کی روشنی میں بنائے گئے یونین کونسل، ڈسٹرکٹ کونسل اور میونسپل ایریا کی وارڈ بندی سے متعلق شرکاء کو تفصیلی بریفنگ دی۔ انہوں نے کہا کہ میونسپل کمیٹی کی حدود کو بڑھایا گیا ہے جو کہ اب حسین آباد سے لے کر شگری خورد ایریا پر محیط ہو گا۔ پہلے میونسپل ایریا میں 14 وارڈ تھے اب اسے بڑھا کر 65 وارڈ بنانے کی تجویز دی گئی ہے۔ اسی طرح یونین کونسل کو بھی بڑھا کر 21 یونین کونسل بنانے کی تجویز دی گئی ہے۔