ممکنہ اسرائیلی حملے کے خطرے کا جائزہ لینے کیلئے عراقی پارلیمنٹ کا غیرمعمولی اجلاس

اسلام ٹائمز۔ عراقی پارلیمنٹ کے سربراہ "محمود المشهدانی" نے کہا کہ سوموار کو ہماری پارلیمنٹ کا ایک غیر معمولی اجلاس منعقد ہو رہا ہے جس میں عراقی سرزمین پر ممکنہ اسرائیلی حملے کے خطرے کا جائزہ لیا جائے گا۔ انہوں نے کہا کہ اس اجلاس میں بعض آشکار اور کچھ مخفی مسائل اٹھائے جائیں گے۔ واضح رہے کہ یہ اجلاس ایک ایسے وقت میں بلایا جا رہا ہے جب عراق کے وزیر خارجہ "فواد حسین" نے گزشتہ جمعے اس امر کی وضاحت کی کہ اسرائیل نے عراق کو حملے کی دھمکی دی ہے۔ فواد حسین نے کہا کہ عراق جنگ کا خواہاں نہیں اور وہ اپنی نپی تُلی پالیسی سے جنگ روکنے کی کوشش کرے گا۔ دوسری جانب یہاں یہ امر بھی قابل غور ہے کہ عراق کی مقاومت اسلامی نے گزشتہ ایک ماہ میں سینکڑوں بار صیہونی عسکری ٹھکانوں کو اپنے حملوں کا نشانہ بنایا ہے۔ عراق کا استقامتی محاذ متعدد مرتبہ اسرائیل کے فوجی اڈوں کو نشانہ بنا چکا ہے۔ اس محاذ کا کہنا ہے کہ آنے والے دنوں میں ہم اسرائیل پر اپنے حملوں میں تیزی لائیں گے۔