تحریک انصاف کا احتجاج، کارکنوں کو بتی چوک پہنچنے کی ہدایت، پورا شہر بند

اسلام ٹائمز۔ پاکستان تحریک انصاف پنجاب کی قیادت میں راستوں کی بندش کے باعث کارکنوں کے اسلام آباد نہ پہنچنے پر اب تمام کارکنوں اور رہنماوں کو راوی روڈ پر بتی چوک پہنچنے کی ہدایت کر دی گئی ہے۔ قیادت کی جانب سے پیغام میں کہا گیا ہے کہ پی ٹی آئی کے ارکان اسمبلی اور ٹکٹ ہولڈرز بھی بتی چوک پہنچیں۔ دوسری جانب پولیس کی بھاری نفری بتی چوک میں تعینات کر دی گئی ہے، کنٹینر لگا کر راستے بھی بند کر دئیے گئے ہیں۔ اینٹی رائٹ فورس کے جوان بھی بتی چوک میں موجود ہیں، جبکہ میٹرو بس سروس بھی بند کر دی گئی ہے۔ادھر نیازی شہید چوک سے جانب راوی پل دونوں اطراف ٹریفک کیلئے بند ہیں۔ شاہدرہ چوک سے جانب نیازی شہید روڈ بھی سڑک بند ہے۔ بیگم کوٹ سے جانب شاہدرہ چوک دونوں اطراف، امامیہ کالونی پھاٹک کے دونوں اطراف کو بھی کنٹینر لگا کر بند کر دیا گیا ہے۔ سگیاں پل کے دونوں اطراف، آزادی فلائی اوور جانب نیازی شہید چوک مزدے لگا بند کیا گیا ہے جبکہ پرانا راوی پل، ایسٹرن بائی پاس، تمام موٹرویز اور فارم روڈ ٹریفک کیلئے بند ہیں۔