پی ٹی آئی کا احتجاج، لاہور سمیت متعدد شہروں میں ٹرین سروس معطل، ٹکٹیں منسوخ

پاکستان ریلوے نے پی ٹی آئی احتجاج کے معاملے پر  لاہور، راولپنڈی اور پشاور کے درمیان تمام ٹرینیں فوری بند کر دی ہیں۔ تفصیلات کے مطابق ریلوے نے پشاور سے راولپنڈی، لاہور سے راولپنڈی جبکہ ملتان اور فیصل آباد سے راولپنڈی کے درمیان تمام ٹرین سروسز بند کر دی ہیں۔ ریلوے حکام کے مطابق آج کی تمام 25 ریل گاڑیوں کی بک ٹکٹیں بھی منسوخ کر دی گئی ہیں، جبکہ آج چلنے والی تمام ریل گاڑیوں کے مسافروں کو ٹکٹوں کے پیسے فوری واپس کرنے کا حکم دیا گیا ہے۔ ریلوے سٹیشن پر پولیس کی بھاری نفری تعینات کر دی گئی ہے جبکہ ریلوے سٹیشن پر مسافروں کا داخلہ بھی مکمل بند کرکے سٹیشن سیل کر دیا گیا ہے۔ مسافروں کو سٹیشن کے عارضی ٹکٹ گھر سے ہی بکنگ ٹکٹوں کے پیسے واپس کیے جائیں گے۔