اسرائیل نے غزہ میں اپنے 2 فوجیوں کی ہلاکت کی تصدیق کردی

اسلام ٹائمز۔ صیہونی فوج نے غزہ میں حماس کے ہاتھوں اپنے 2 فوجیوں کے ہلاک اور ایک کے زخمی ہونے کی تصدیق کردی۔ اسرائیلی میڈیا کا کہنا ہے کہ شمالی غزہ کی پٹی میں حماس سے جھڑپ کے دوران 2 فوجی ہلاک ہوگئے ہیں، جن میں ایک 20 سالہ ایتائی اور دوسرا 22 سالہ یائر حنانیا شامل ہے۔ اسرائیلی فوج کا کہنا ہے کہ دونوں فوجی گیواتی بریگیڈ کی شاکد بٹالین سے منسلک تھے، جبکہ اسی واقعے میں ایک اور فوجی شدید زخمی ہوا۔

صیہونی حکومت نے تسلیم کیا کہ غزہ جنگ کے آغاز سے اب تک 6 کرنل اور اعلیٰ افسران سمیت اسرائیلی فوج کے 778 اعلیٰ افسران و اہلکار اور 68 اسرائیلی پولیس اہلکار بھی مارے گئے۔ خیال رہے کہ 7 اکتوبر 2023ء کے بعد سے اسرائیلی فوج کی بمباری سے غزہ میں اب تک 43 ہزار 314 لوگ شہید ہوگئے ہیں، جبکہ 1 لاکھ 2 ہزار 19 زخمی ہوچکے ہیں۔ 7 اکتوبر 2023ء کو اسرائیل میں حماس کے حملوں میں کم از کم 1139 اسرائیلی ہلاک اور 200 سے زیادہ لوگوں کو قیدی بنا لیا گیا تھا۔