غرب اردن میں فائرنگ کی کارروائی جراتمندانہ ردعمل ہے، حماس

اسلام ٹائمز۔ اسلامی تحریک مزاحمت حماس کا کہنا ہے کہ غرب اردن کے شہر قلقیلیہ کے مشرق میں فلسطینی نوجوانوں کی طرف سے فائرنگ کا واقعہ اس بات کی تصدیق کرتا ہے کہ مغربی کنارے میں مزاحمت قابض دشمن کی دہشت گردی اور سخت سکیورٹی اقدامات کے باوجود جاری رہے گی۔ تنظیم نے ایک اخباری بیان میں کہا ہے کہ سوموار کی صبح قلقیلیہ کے مشرق میں واقع گاؤں الفندق میں پیش آنے والا یہ فائرنگ کا واقعہ ایک جراتمندانہ ردعمل ہے، جو قابض دشمن کی جانب سے ہمارے عوام کے خلاف جاری جرائم، غزہ میں نسل کشی کی جنگ، مقبوضہ مغربی کنارے میں جبری نقل مکانی کے منصوبے، اور مسجد اقصیٰ و دیگر مقدسات کے خلاف قابض فوج اور آباد کاروں کی جارحیت، خاص طور پر انتہا پسند گروہوں کے اقدامات کے خلاف ہے۔