جب تک سیاسی استحکام نہیں لائیں گے، تب تک معاشی استحکام بھی نہیں لا سکتے، لطیف کھوسہ

اسلام ٹائمز۔ پاکستان تحریکِ انصاف کے رکنِ قومی اسمبلی لطیف کھوسہ نے کہا ہے کہ محمود خان اچکزئی، اختر مینگل اور دیگر کے مشورے پر سول نافرمانی تحریک کی کال مؤخر کی گئی۔ اپنے ایک بیان میں انہوں نے کہا کہ حکومت پہلے کہتی تھی کہ بات نہیں کرتے، بات چیت کے لیے کمیٹی بنا دی تو اب تمسخر اڑاتے ہیں، جب تک سیاسی استحکام نہیں لائیں گے تب تک معاشی استحکام بھی نہیں لا سکتے۔

لطیف کھوسہ نے کہا کہ جنہوں نے فارم 47 کے ذریعے انہیں بٹھایا ہے، یہ انہی کی غلامی میں چل رہے ہیں، 26 ویں ترمیم کے بعد واضح ہوگیا کہ انہوں نے عدلیہ کے اوپر کاٹھی پوری ڈال لی ہے۔ پی ٹی آئی رہنماء نے کہا کہ عوام کو انصاف کی ذرا بھی امید نظر آرہی تھی، وہ من پسند فیصلے لے کر منہدم کر دی ہے۔ لطیف کھوسہ نے کہا کہ مجھے بتائیں کہ کیا ان من پسند فیصلوں سے ملک میں استحکام آجائے گا۔؟