بھارت یہ جان لے کہ کشمیری عوام کی یہ جدوجہد مقبوضہ کشمیر کی آزادی تک جاری رہے گی، بیرسٹر سلطان

اسلام ٹائمز۔ صدر آزاد کشمیر بیرسٹر سلطان محمود چوہدری نے کہا ہے کہ برطانیہ میں مقیم کشمیری مسئلہ کشمیر کو اُجاگر کرنے کے لئے اپنا کردار ادا کریں کیونکہ بھارت نے مقبوضہ کشمیر میں انسانی حقوق کی پامالیوں میں بے انتہاء اضافہ کر دیا ہے اور حال ہی میں بھارت نے مقبوضہ کشمیر میں جعلی انتخابات کا ڈرامہ رچایا ہے لیکن بھارت یہ جان لے کہ وہ دنیا کی آنکھوں میں دھول نہیں جھونک سکتا۔ دنیا بھر میں مقیم کشمیری بالخصوص برطانیہ میں مقیم کشمیری ہر فورم پر مظلوم کشمیریوں کے لئے اپنی آواز بلند کریں۔ ان خیالات کا اظہار انہوں نے آج یہاں ایوان صدر کشمیر ہاؤس اسلام آباد میں کشمیر پیس فورم انٹرنیشنل برطانیہ (نارتھ زون) کے صدر چوہدری مالک سے ایک تفصیلی ملاقات میں کیا۔ اس موقع پرلوٹن برطانیہ سے شاکر علی نے بھی صدر ریاست آزاد جموں و کشمیر بیرسٹر سلطان محمود چوہدری سے ایوان صدر کشمیر ہاؤس میں ملاقات کی۔ 

اس موقع پر صدر آزاد جموں و کشمیر بیرسٹر سلطان محمود چوہدری نے کہا کہ 05 اگست 2019ء کے بعد سے اب تک بھارت نے کشمیریوں پر مظالم کے پہاڑ توڑ دیے ہیں۔ ایسے وقت میں برطانیہ میں مقیم کشمیری مقبوضہ کشمیر کے مظلوم عوام کی آواز بنیں۔ بھارت یہ جان لے کہ کشمیری عوام کی یہ جدوجہد مقبوضہ کشمیر کی آزادی تک جاری و ساری رہے گی۔ اس موقع پر کشمیرپیس فورم انٹرنیشنل برطانیہ (نارتھ زون) کے صدر چوہدری مالک نے صدر ریاست آزاد جموں و کشمیر بیرسٹر سلطان محمود چوہدری کو برطانیہ کے دورے کی دعوت دی جو صدر ریاست نے قبول کرتے ہوئے کہا کہ وہ جلد برطانیہ کا تفصیلی دورہ کریں گے۔