بی جے پی نوجوانوں کو روزگار نہیں دے سکتی ہے، پرینکا گاندھی

اسلام ٹائمز۔ انڈین نیشنل کانگریس کی رکن پارلیمنٹ پرینکا گاندھی واڈرا نے حال ہی میں مشتہر کردہ عہدوں پر ملازمت کے خواہش مندوں سے جی ایس ٹی وصول کرنے پر اترپردیش میں یوگی آدتیہ ناتھ کی قیادت والی بی جے پی حکومت پر تنقید کی ہے۔ کلیان سنگھ سپر اسپیشلٹی کینسر انسٹی ٹیوٹ (کے ایس ایس ایس سی آئی) لکھنؤ کی طرف سے مطلع شدہ ملازمت کے اشتہاری نوٹیفکیشن میں انسٹی ٹیوٹ نے او بی سی/ای ڈبلیو ایس سے تعلق رکھنے والے امیدواروں کے لئے 1000 روپے اور ایس سی/ایس ٹی امیدواروں کے لئے 600 روپے کی درخواست فیس کا اعلان کیا ہے۔

نوٹیفکیشن کے مطابق کے ایس ایس ایس سی آئی کی طرف سے درخواست فارم پر او بی سی/ای ڈبلیو ایس امیدواروں کے لئے 180 روپے اور ایس سی/ایس ٹی امیدواروں کے لئے 108 روپے کا جی ایس ٹی بھی وصول کیا گیا ہے۔ ایکس پر ملازمت کے اشتہار کا نوٹیفکیشن شیئر کرتے ہوئے کانگریس رکن پارلیمنٹ پرینکا گاندھی نے بی جے پی حکومت کو "امتحانی فارم پر 18 فیصد جی ایس ٹی لگا کر نوجوانوں کے زخموں پر نمک چھڑکنے" کا کہہ کر نشانہ بنایا۔

انہوں نے پوسٹ میں مزید لکھا کہ بی جے پی نوجوانوں کو روزگار نہیں دے سکتی لیکن امتحانی فارم پر 18 فیصد جی ایس ٹی لگا کر نوجوانوں کے زخموں پر نمک چھڑک رہی ہے۔ اگنیور سمیت ہر سرکاری ملازمت کے فارم پر جی ایس ٹی وصول کیا جا رہا ہے۔ انہوں نے کہا کہ فارم بھرنے کے بعد اگر حکومت کی ناکامی کی وجہ سے پیپر لیک ہو جائے یا کرپشن ہو تو نوجوانوں کا یہ پیسہ ضائع ہو جاتا ہے۔ انہوں نے کہا کہ والدین اپنی جانیں قربان کرتے ہیں اور اپنے بچوں کو پڑھانے اور امتحانات کی تیاری کے لئے ایک ایک پیسہ بچاتے ہیں، لیکن بی جے پی حکومت نے ان کے خوابوں کو آمدنی کا ذریعہ بنا دیا ہے۔