پنجاب میں ایک ہفتے کیلئے ماسک پہننا لازم قرار دیدیا گیا

اسلام ٹائمز۔ پنجاب حکومت نے سموگ سے متاثرہ صوبے کے تمام شہروں میں ایک ہفتے کیلئے ماسک پہننا لازم قرار دیدیا گیا ہے اور کہا ہے کہ صحت کو ترجیح دینا ہماری اجتماعی ذمہ داری ہے۔ تفصیلات کے مطابق پنجاب حکومت نے سموگ سے متاثرہ اضلاع کے تمام شہروں میں فیس ماسک پہننا لازمی قرار دے دیا ہے۔ اس حوالے سے نگراں وزیراعلیٰ پنجاب محسن نقوی نے ایکس پر ٹویٹ کی ہے اور صوبائی حکومت کی جانب سے جاری نوٹیفکیشن بھی پوسٹ کیا ہے۔ محسن نقوی کا کہنا تھا کہ متاثرہ اضلاع میں ایک ہفتے کیلئے ماسک لازمی قرار دیا گیا ہے، صحت کو ترجیح دینا ہماری اجتماعی ذمہ داری ہے، عوام سے درخواست ہے کہ محفوظ معاشرے کیلئے ہدایات پر عمل کریں۔ واضح رہے کہ لاہور، فیصل آباد اور گوجرانوالہ سمیت پنجاب کے کئی شہروں میں آج بھی اور کئی دنوں سے فضائی آلودگی کی خطرناک صورتِحال ہے، متعدد شہروں میں سموگ کے باعث نزلہ زکام، بخار اور گلے میں انفیکشن کی شکایات سامنے آ رہی ہیں۔