پی ٹی آئی کا شیرازہ بکھر چکا، ’ڈو اینڈ ڈائی‘ والے جلسے کا کیا ہوا؟ ڈاکٹر مصدق ملک

اسلام ٹائمز۔ وفاقی وزیر پٹرولیم ڈاکٹر مصدق ملک نے کہا ہے کہ پی ٹی آئی کا شیرازہ بکھر چکا،’ ڈو اینڈ ڈائی‘ والے جلسے کا کیا ہوا۔؟ شہر قائد میں میڈیا سے گفتگو کرتے ہوئے ڈاکٹر مصدق ملک کا کہنا تھا کہ  تحریک انصاف کی جانب سے اسلام آباد میں دھاوا بولا جارہا ہے، تحریک انصاف لاہور کی قیادت آج کہاں ہے۔؟ پنجاب کے کسی شہر میں مظاہرین نظر نہیں آرہے ہیں۔ انہوں نے کہا کہ ایک یلغار خیبر پختونخوا سے آرہی ہے، علی امین گنڈا پور اسلام آباد میں دھاوا بولنا چاہتے ہیں۔ پی ٹی آئی والے نہیں چاہتے کہ عمران خان باہر آئیں اور ان کی صلح صفائی ہو، وزیر اعلیٰ خیبر پختونخوا کو عوام کا کوئی خیال نہیں، ہر طرف آواز لگائی جارہی ہے پکڑ لو، جلاؤ دو۔

ڈاکٹر مصدق ملک کا کہنا تھا کہ لاہور، فیصل آباد، گوجرانوالہ، ملتان میں پی ٹی آئی کے جلسے کہاں گئے۔؟ آج ’ڈو اینڈ ڈائی‘ والے جلسے کا کیا ہوا، سندھ کے لوگ آج کہاں ہیں ۔؟ پی ٹی آئی کا شیرازہ بکھر چکا ہے، یہ نہ ہو کہ پی ٹی آئی لیڈران ایک بار پھر پتلی گلی سے کے پی ہاؤس پہنچ جائیں۔ انہوں نے عمران خان کی اہلیہ پر تنقید کے نشتر چلاتے ہوئے کہا کہ بشریٰ بی بی آج کارکنوں کو ہدف دے رہی ہیں، بشریٰ بی بی تو غیر سیاسی تھیں وہ جلسے کی قیادت کیوں کررہی ہیں، دوسرے کو طعنہ دینے والے موروثی سیاست کررہے ہیں، دوست ممالک نے ہماری اور بانی پی ٹی آئی کی ہمیشہ مدد کی، انہیں ان کا ہی خیال کرنا چاہیے۔ وفاقی وزیر پٹرولیم کا مزید کہنا تھا کہ حکومتی اقدامات سے مہنگائی میں کمی ہوئی ہے، سٹاک مارکیٹ ملک کی بلند ترین سطح پر ہے، عوام کے مسائل کا حل ترجیح ہے۔