اسلام ٹائمز - پی ٹی آئی کا شیرازہ بکھر چکا، ’ڈو اینڈ ڈائی‘ والے جلسے کا کیا ہوا؟ ڈاکٹر مصدق ملک

پی ٹی آئی کا شیرازہ بکھر چکا، ’ڈو اینڈ ڈائی‘ والے جلسے کا کیا ہوا؟ ڈاکٹر مصدق ملک

شہر قائد میں میڈیا سے گفتگو کرتے ہوئے وفاقی وزیر پٹرولیم نے بانی پی ٹی آئی کی اہلیہ پر تنقید کے نشتر چلاتے ہوئے کہا کہ اہلیہ بانی پی ٹی آئی آج کارکنوں کو ہدف دے رہی ہیں، وہ تو غیر سیاسی تھیں وہ جلسے کی قیادت کیوں کررہی ہیں، دوسرے کو طعنہ دینے والے موروثی سیاست کررہے ہیں، دوست ممالک نے ہماری اور بانی پی ٹی آئی کی ہمیشہ مدد کی، انہیں ان کا ہی خیال کرنا چاہیے۔

اسلام ٹائمز۔ وفاقی وزیر پٹرولیم ڈاکٹر مصدق ملک نے کہا ہے کہ پی ٹی آئی کا شیرازہ بکھر چکا،’ ڈو اینڈ ڈائی‘ والے جلسے کا کیا ہوا۔؟ شہر قائد میں میڈیا سے گفتگو کرتے ہوئے ڈاکٹر مصدق ملک کا کہنا تھا کہ تحریک انصاف کی جانب سے اسلام آباد میں دھاوا بولا جارہا ہے، تحریک انصاف لاہور کی قیادت آج کہاں ہے۔؟ پنجاب کے کسی شہر میں مظاہرین نظر نہیں آرہے ہیں۔ انہوں نے کہا کہ ایک یلغار خیبر پختونخوا سے آرہی ہے، علی امین گنڈا پور اسلام آباد میں دھاوا بولنا چاہتے ہیں۔ پی ٹی آئی والے نہیں چاہتے کہ عمران خان باہر آئیں اور ان کی صلح صفائی ہو، وزیر اعلیٰ خیبر پختونخوا کو عوام کا کوئی خیال نہیں، ہر طرف آواز لگائی جارہی ہے پکڑ لو، جلاؤ دو۔

ڈاکٹر مصدق ملک کا کہنا تھا کہ لاہور، فیصل آباد، گوجرانوالہ، ملتان میں پی ٹی آئی کے جلسے کہاں گئے۔؟ آج ’ڈو اینڈ ڈائی‘ والے جلسے کا کیا ہوا، سندھ کے لوگ آج کہاں ہیں ۔؟ پی ٹی آئی کا شیرازہ بکھر چکا ہے، یہ نہ ہو کہ پی ٹی آئی لیڈران ایک بار پھر پتلی گلی سے کے پی ہاؤس پہنچ جائیں۔ انہوں نے عمران خان کی اہلیہ پر تنقید کے نشتر چلاتے ہوئے کہا کہ بشریٰ بی بی آج کارکنوں کو ہدف دے رہی ہیں، بشریٰ بی بی تو غیر سیاسی تھیں وہ جلسے کی قیادت کیوں کررہی ہیں، دوسرے کو طعنہ دینے والے موروثی سیاست کررہے ہیں، دوست ممالک نے ہماری اور بانی پی ٹی آئی کی ہمیشہ مدد کی، انہیں ان کا ہی خیال کرنا چاہیے۔ وفاقی وزیر پٹرولیم کا مزید کہنا تھا کہ حکومتی اقدامات سے مہنگائی میں کمی ہوئی ہے، سٹاک مارکیٹ ملک کی بلند ترین سطح پر ہے، عوام کے مسائل کا حل ترجیح ہے۔