اہم چیلنجز سے نمٹنے کیلئے امریکہ پاکستان کیساتھ کھڑا رہے گا، جوبائیڈن کا شہباز شریف کو خط

اسلام ٹائمز۔ وزیراعظم شہباز شریف کو امریکی صدر جو بائیڈن نے خط لکھا ہے جس میں نو منتخب حکومت کے لئے نیک تمناؤں کا اظہار کیا گیا ہے۔ وزیراعظم کے منصب سنبھالنے کے بعد امریکی صدر کا یہ پہلا خط ہے۔ خط کے متن میں امریکی صدر نے کہا اہم چیلنجز کا سامنا کرنے میں امریکہ پاکستان کے ساتھ کھڑا رہے گا۔ خط میں امریکی صدر جوبائیڈن نے کہا ہے کہ دونوں ممالک کے عوام کے درمیان شراکت داری دنیا اور ہمارے عوام کی سلامتی یقینی بنانے میں نہایت اہم ہے۔ امریکہ پاکستان گرین الائنس فریم ورک سے ماحولیاتی بہتری کے لئے ہم اپنے اتحاد کو مزید مضبوط کریں گے۔

امریکی صدر نے خط میں کہا کہ پائیدار زرعی ترقی، آبی انتظام اور سیلاب کے تباہ کن اثرات سے بحالی میں پاکستان کی معاونت جاری رکھیں گے۔ صحت عامہ کا تحفظ، معاشی ترقی اور سب کے لئے تعلیم مشترکہ وژن ہے جسے مل کر فروغ دیتے رہیں گے۔ خط میں امریکی صدر کا کہنا تھا کہ پاکستان کے ساتھ مل کر انسانی حقوق کے تحفظ اور ترقی کے فروغ کے لئے پُرعزم ہیں۔ دونوں اقوام کے درمیان استوار مضبوط پارٹنرشپ کو تقویت دیں گے۔ وزیراعظم شہباز شریف کو خط میں امریکی صدر جوبائیڈن نے کہا کہ دونوں ممالک کے عوام کے درمیان استوار قریبی رشتے مزید مضبوط بنائیں گے۔