دختر مشرق شہید بینظیر بھٹو کی 17 ویں برسی آج منائی جا رہی ہے

اسلام ٹائمز۔ عالم اسلام کی پہلی خاتون وزیراعظم، دختر مشرق بے نظیر بھٹو شہید کی 17 ویں برسی آج منائی جا رہی ہے۔ 2 بار پاکستان کی وزیراعظم بننے والی بے نظیر بھٹو نے اپنی زندگی میں سیاسی مخالفین کے ساتھ جنرل ضیا اورجنرل مشرف کی آمریتوں کا مقابلہ کیا۔ بے نظیر بھٹو 2007ء میں جلاوطنی ختم کر کے پاکستان پہنچیں تو پہلے 18 اکتوبر کو استقبالی جلوس میں دھماکے ہوئے جن میں سینکڑوں افراد جاں بحق ہوئے۔ پھر 27 دسمبر 2007ء کو بے نظیر بھٹو راولپنڈی لیاقت باغ میں جلسے سے واپسی پرجان لیوا حملے میں عوام کی محبوب قائد دنیا سے رخصت ہو گئیں۔