ہم غزہ میں کسی بھی قسم کی انسانی امداد کے سخت خلاف ہیں، اتمار بن گویر

اسلام ٹائمز۔ غاصب صیہونی رژیم کے انتہاپسند وزیر اندرونی سلامتی اتمار بن گویر (Itamar Ben-Gvir) نے ایک بار پھر غزہ کو انسانی امداد کی مکمل بندش کا مطالبہ کیا ہے۔

صہیونی میڈیا نیشنل نیوز کو انٹرویو دیتے ہوئے اتمار بن گویر نے کہا کہ وہ حماس کے ساتھ جنگ ​​کے دوران غزہ میں کسی بھی قسم کی انسانی امداد بھیجنے کے سخت خلاف ہے۔ انتہاپسند صیہونی وزیر نے زور دیتے ہوئے کہا کہ میرا ماننا ہے کہ جب تک ہمارے یرغمالی (قیدی) غزہ میں موجود ہیں، ہمیں اس علاقے میں ذرہ برابر امداد نہیں جانے دینا چاہیئے، یہاں تک کہ بھوک سے بلکتے عام شہریوں کے لئے بھی کوئی رعایت نہیں دینی چاہیئے!

واضح رہے کہ امسال ستمبر میں غزہ میں موجود 6 اسرائیلی قیدیوں کی ہلاکت کے بعد بن گویر نے مطالبہ کیا تھا کہ تل ابیب، انسانی امداد کو غزہ میں داخل ہونے سے مکمل طور پر روک دے۔