منموہن سنگھ کی آخری رسومات کل سرکاری اعزاز کیساتھ ادا کی جائینگی

اسلام ٹائمز۔ ڈاکٹر منموہن سنگھ کی آخری رسومات پورے سرکاری اعزاز کے ساتھ ادا کی جائیں گی۔ مرکزی حکومت نے سابق وزیراعظم منموہن سنگھ کے انتقال پر سات روزہ قومی سوگ کا اعلان کیا ہے۔ منموہن سنگھ کی آخری رسومات کل بروز ہفتہ صبح 10-11 بجے دہلی میں شکتی اسٹال کے قریب ادا کی جائیں گی۔ ان کی بیٹی آج دیر رات امریکہ سے دہلی پہنچیں گی۔ ڈاکٹر منموہن سنگھ کی جسد خاکی موتی لال نہرو مارگ، دہلی پر واقع ان کی رہائشگاہ پر رکھی گئی ہے۔ ان کی جسد خاکی کو کل رات ایمس سے یہاں لایا گیا تھا۔ بھارت میں سابق وزیراعظم کی آخری رسومات کے دوران خصوصی ریاستی پروٹوکول کی پیروی کی جاتی ہے۔ اس کا مقصد ملک کے لئے ان کی شراکت اور ان کے مقام کے وقار کا احترام کرنا ہے۔


آخری رسومات سے قبل سابق وزیراعظم کی جسد خاکی کو ہندوستان کے قومی پرچم یعنی ترنگے میں لپیٹا جاتا ہے۔ اس کے علاوہ آخری رسومات کے دوران انہیں 21 توپوں کی سلامی بھی دی جاتی ہے۔ اس سلامی کو اعلیٰ ترین ریاستی اعزاز کی علامت سمجھا جاتا ہے۔ سابق وزیراعظم منموہن سنگھ کے آخری دورے کے موقع پر سکیورٹی اور پروٹوکول کی سختی سے پیروی کی جاتی ہے۔ ان کے آخری سفر میں عام لوگوں سے لے کر معززین اور سیاستدانوں تک شریک ہونگے۔ اس کے علاوہ فوجی بینڈ اور مسلح افواج کے جوان بھی آخری سفر میں شامل ہو کر روایتی مارچ کرتے ہیں۔