شہر قائد کے شہری پانی نہ ہونے پر ہرچوک میں سراپا احتجاج ہیں، منعم ظفر

اسلام ٹائمز۔ ضلعی امیر جماعت اسلامی منعم ظفر نے کہا کہ شہر قائد کے شہری پانی نہ ہونے پر ہرچوک میں سراپا احتجاج ہیں۔ امیر جماعت اسلامی کراچی منعم ظفر کا مظاہرے سےخطاب کرتے ہوئے کہنا تھا کہ کراچی میں کئی سال سے پانی کا مسئلہ ہے، گزشتہ کئی دنوں سے یہاں کے باسی پریشان ہیں۔ انہوں نے کہا کہ لوگ پانی نہ ہونے کے باعث ہر چوک پر جمع ہیں، یہ یہاں کے ہر فرد کا مسئلہ ہے، شہر قائد کے 50 فیصد علاقے پچھلے 15 دن پانی سے محروم ہیں، دھابیجی کی لائن پھٹ گئی، لوگ پانی سےمحروم ہوئے ہیں۔

منعم ظفر کا کہنا تھا کہ نعمت اللہ خان نے کے-3 اور کے-4 منصوبہ دیا، 19  سال ہوگئے، کراچی کے پانی کے نظام میں ایک بوند کا اضافہ بھی نہیں ہوا، آپ نے اس شہر کو پانی سے محروم کیا، وہ شہر جو صوبے کے بجٹ میں 96 فیصد حصہ ڈالتا ہے۔ ضلعی امیر جماعت اسلامی نے کہا کہ اس شہر کو آپ نلکوں میں پانی نہیں بلکہ ٹینکر میں پانی دیتے ہو۔ پچھلے 15 دن میں آپ نے 12 ارب روپے کا پانی فروخت کیا، سب کچھ ہو رہا ہے لیکن کے فور کا منصوبہ مکمل نہیں ہو رہا ہے۔ ان کا کہنا تھا کہ حکومت شہر کو پانی دینے کے لئے تیار نہیں جس پر جماعت اسلامی کی جانب سے کراچی شہر کے مختلف علاقوں میں پانی کی بندش کے خلاف احتجاج کیا جارہا ہے۔