پاراچنار میں راستوں کی بندش کے باعث تمام تعلیمی ادارے بند کر دیے گئے

اسلام ٹائمز۔ پاراچنار میں راستوں کی بندش کے باعث تمام سرکاری و نجی تعلیمی ادارے آج سے بند کر دیے گئے ہیں۔ تعلیمی اداروں کے سربراہان کے مطابق مرکزی شاہراہ کو کھولنے اور محفوظ بنانے تک پاراچنار میں تعلیمی ادارے بند رہیں گے۔ ایم ڈبلیو ایم سے تعلق رکھنے والے ایم این اے حمید حسین نے کہا ہے کہ بے امنی و راستوں کی بندش سے زندگی کا ہر شعبہ متاثر ہوا ہے، چھٹیوں پر آئے ہوئے اوورسیز پاکستانیوں کے ویزے اور ٹکٹ بھی ضائع ہوگئے۔ ڈپٹی کمشنر رمضان سیماب کا کہنا ہے کہ قیامِ امن کے لیے کوہاٹ میں جاری گرینڈ جرگے میں آج حتمی فیصلہ متوقع ہے۔ واضح رہے کہ نومبر کے آخر میں ضلع کرم میں اوچت کے مقام پر مسافر گاڑیوں پر مسلح افراد کی فائرنگ سے 38 افراد جاں بحق ہوگئے تھے۔