القسام اور صیہونی فوج کے جھڑپ میں 3 صیہونی فوجی ہلاک

فلسطین کی حماس تحریک کی فوجی شاخ القسام نے شمالی غزہ کی پٹی میں صیہونی فوجیوں کے ساتھ جھڑپ کے دوران تین صیہونی فوجیوں کو ہلاک کرنے کا دعویٰ کیا ہے۔ فارس نیوز کے مطابق القسام بریگیڈز نے آج منگل کو غزہ کے شمال میں واقع جبالیہ کیمپ کے مغرب میں صیہونی فوجیوں کے ایک گروہ کے ساتھ ہونے والی لڑائی کی تفصیلات بتائیں۔ القسام نے کہا کہ اس جھڑپ میں تین صیہونی فوجیوں کو ہلاک کیا گیا، اور صیہونی ہیلی کاپٹروں نے ہلاک شدگان اور زخمیوں کو اس علاقے سے نکالا۔

صیہونی فوج نے بھی تصدیق کی کہ غزہ کے شمالی علاقے جبالیہ میں گیواتی بریگیڈ کے تین فوجی ہلاک ہو گئے ہیں۔ صیہونی ذرائع نے صبح کے وقت یہ خبر دی کہ رفح کے علاقے میں فلسطینی مزاحمتی گروپوں کے ساتھ جھڑپ کے دوران دو صیہونی فوجی ہلاک ہو گئے، اور ایک عمارت کے گرنے سے یہ ہلاکتیں ہوئیں۔ صیہونی ذرائع کے مطابق، یہ فوجی مزاحمتی گروپوں کے حملے میں پھنس کر ہلاک ہو گئے ہیں، اور کم از کم 5 فوجی مزید زخمی ہو گئے ہیں۔

اسرائیل کی وزارت جنگ نے اس رپورٹ کے شائع ہونے تک کوئی بیان جاری نہیں کیا، تاہم وزارت نے اپنے حالیہ اعداد و شمار میں دعویٰ کیا ہے کہ صیہونی فوج کے زخمیوں کی تعداد 13,500 تک پہنچ چکی ہے۔ تاہم، مزاحمتی گروپوں نے بار بار کہا ہے کہ صیہونی فوج اپنے ہلاک شدگان کی اصل تعداد کو چھپاتی ہے اور جو اعداد و شمار جاری کیے گئے ہیں وہ درست نہیں ہیں۔