جنوبی لبنان میں صیہونی فوج کی فائرنگ، درجنوں شہری زخمی و شہید

اسلام ٹائمز۔ لبنان کی وزارت صحت نے اعلان کیا کہ ملک کے جنوب میں صیہونی فوج کے حملے سے دو لبنانی شہری شہید اور 31 افراد زخمی ہو گئے۔ عبرانی نیوز ویب نے اس واقعے کو رپورٹ کرتے ہوئے بتایا کہ اسرائیلی فوج کی فائرنگ سے اب تک دو لبنانی شہری شہید ہو چکے ہیں۔ الجزیرہ کے رپورٹر نے بتایا کہ "برج الملوک"، "کفرکلا" اور "حولا" میں صیہونی فورسز کی فائرنگ سے 10 لبنانی شہری زخمی ہو گئے۔ دوسری جانب لبنانی فوج بھی ملک کے جنوبی علاقے "عیتا شعب" داخل ہو گئی۔ اُدھر صیہونی فوج نے اعلان کیا کہ لبنانی شہری جنوبی لبنان کے 26 علاقوں میں اپنے گھروں کو نہیں لوٹ سکتے۔ اسرائیلی فوج کے ریڈیو نے جنوبی لبنان کے علاقے "حولا" میں 2 شہریوں کو اپنے گھروں میں واپسی کے دوران گرفتار کرنے کی خبر دی۔ صیہونی ٹی وی 12 نے رپورٹ دی کہ آج صبح دو محاذوں پر بحرانی کییفیت پیدا ہو چکی ہے کیونکہ ایک سمت جنوبی لبنان کے لوگ اپنے علاقوں میں واپس آنے کے لئے پر تول رہے ہیں تو دوسری جانب غزہ کی پٹی کے ہزاروں افراد اپنے تباہ حال گھروں کی طرف روانہ ہیں۔ جنوبی لبنان کے باشندے "حزب الله" کے سابق سربراہ شہید "سید حسن نصر اللہ" کی تصویریں اٹھائے اور "لبیک یا نصر الله" کے نعرے لگاتے اپنے گھروں میں واپس جا رہے ہیں۔ دلچسپ بات یہ ہے کہ انہیں صیہونی مرکاوا ٹینکوں کی کوئی پروا نہیں۔