غزہ کا کمال عدوان اسپتال صہیونی جارحیت کا شکار

اسلام ٹائمز۔ صیہونی فوج نے غزہ کی شمالی پٹی میں کمال عدوان اسپتال کے آس پاس کی عمارتوں پر حملے کے بعد اسپتال کو نذر آتش کر دیا۔ فارس نیوز کے مطابق، غزہ کی وزارتِ صحت کے ڈائریکٹر حسام ابوصفیہ نے آج (جمعہ) الجزیرہ کو بتایا کہ قابض صیہونی افواج نے اچانک کمال عدوان اسپتال پر دھاوا بولتے ہوئے تقریباً 350 مریضوں اور طبی عملے کو زبردستی باہر نکال دیا۔

ابوصفیہ نے کہا کہ اسپتال کے ساتھ ہر قسم کا رابطہ منقطع ہو گیا ہے، اور ایمبولینسیں جو کمال عدوان اسپتال کی طرف بھیجی گئی تھیں، اب غزہ کی وزارتِ صحت کے عملے سے کوئی رابطہ نہیں کر پا رہیں۔ الجزیرہ نے رپورٹ کیا کہ صہیونی فوج نے کمال عدوان اسپتال کو آگ لگا دی ہے۔ غزہ کی وزارتِ صحت کے ڈائریکٹر نے یہ بھی بتایا کہ قابض صیہونی افواج نے گزشتہ روز اسپتال کے کچھ حصوں کو تباہ کرنے کے لیے خودکش روبوٹس استعمال کیے۔

حسام ابوصفیہ نے مزید بتایا کہ صیہونی فوج نے کل کمال عدوان اسپتال پر ایک میزائل داغا، جس کے نتیجے میں 5 طبی عملہ شہید ہو گیا۔ انہوں نے یہ بھی کہا کہ شہداء کی لاشیں اسپتال کے ارد گرد موجود ہیں، جنہیں آوارہ کتے نوچ رہے ہیں۔ آج صبح کے وقت خبروں کے ذرائع نے رپورٹ کیا کہ صیہونی فوج نے کمال عدوان اسپتال کے قریب ایک عمارت پر حملہ کیا، جس میں 50 فلسطینیوں، بشمول 3 طبی عملہ، کو شہید کر دیا گیا۔