صیہونی فوج کی جانب سے شام میں مظاہرین پر فائرنگ

اسلام ٹائمز۔ صیہونی قابض فوج نے جنوبی شام کے ایک گاؤں میں مظاہرین پر فائرنگ کی۔ فارس نیوز کے مطابق قابض فوج نے اس بات کی تصدیق کی ہے کہ مظاہرین پر گولیاں چلائی گئیں، جو جنوبی شام میں اس فوج کی موجودگی کے خلاف مظاہرہ کر رہے تھے۔ یہ مظاہرہ گاؤں معریہ میں ہو رہا تھا، اور صیہونی فوج نے دعویٰ کیا کہ گولی چلانا ایک خطرے سے نمٹنے کے لیے کیا گیا۔ ابھی تک اس واقعے میں ہونے والے جانی نقصان کی کوئی واضح رپورٹ سامنے نہیں آئی۔

تاہم صیہونی اخبار ٹائمز آف اسرائیل نے دعویٰ کیا کہ ایک شخص زخمی ہوا ہے۔ کل کی رپورٹ کے مطابق، صیہونی قابض فوج نے معریہ گاؤں میں ایک فوجی اڈے پر مورچے قائم کر کے کسانوں کو اپنی زمینوں تک رسائی سے روک دیا۔ خبر رساں ادارے ایسوسی ایٹڈ پریس نے بدھ کو اطلاع دی کہ معریہ گاؤں، جنوبی شام کے صوبہ درعا کے مغربی حصے میں واقع ہے اور مقبوضہ گولان کی پہاڑیوں کے قریب ہے۔ عبدالرسول عیسی، جو گاؤں کے ایک رہائشی ہیں، نے کہا کہ صیہونی فوج ایک کلومیٹر اندر گاؤں میں داخل ہو گئی ہے اور ہمیں کہہ رہی ہے کہ ہم اپنے تمام ہتھیار قابض فوج کو حوالے کر دیں۔

لیکن ہم نے کہا کہ ہمارے پاس کوئی ہتھیار نہیں ہیں۔ انہوں نے مزید کہا کہ وہ ہمیں زراعت کی سرگرمیاں کرنے سے روکتے ہیں اور ہمیں آزادانہ طور پر نقل و حرکت کی اجازت نہیں دیتے۔ ہم اقوام متحدہ سے مطالبہ کرتے ہیں کہ وہ قابض فوج کو فوری طور پر یہاں سے نکالے۔ بدھ کے روز بھی صوبہ قنیطرہ میں حائل علاقے کے رہائشیوں اور معروف شخصیات کے ایک گروہ نے بیان میں شکایت کی کہ قابض فوج نے بعض گاؤں کے رہائشیوں کو جبری ہجرت پر مجبور کر دیا ہے۔