پی بی 36 کی ری پولنگ کو متنازعہ بنایا جا رہا ہے، سعید لانگو

اسلام ٹائمز۔ جمعیت علمائے اسلام بلوچستان کے رہنماء اور پی بی 36 کے امیدوار سعید لانگو کا کہنا ہے کہ ان کے حلقے میں ری پولنگ کے عمل کو متنازعہ بنایا جا رہا ہے۔ سیکیورٹی کا بہانہ بنا کر پولنگ اسٹیشنز کو تبدیل کرکے سابق وزیر داخلہ ضیاء لانگو کو فائدہ پہنچانے کی کوشش کی جا رہی ہے۔ جے یو آئی رہنماء سعید احمد لانگو نے کوئٹہ میں پریس کانفرنس کرتے ہوئے کہا کہ قلات کی صوبائی نشست پر دوبارہ پولنگ کو بلاوجہ متنازعہ کرنے کی کوشش کی جا رہی ہے۔ الیکشن کمیشن نے پہلے 23 نومبر کی تاریخ کا اعلان کیا، پھر انتظامیہ اور حکومت کی مداخلت پر تاریخ تبدیل کرکے 1 دسمبر کی تاریخ کا اعلان کیا گیا۔

انہوں نے کہا کہ پی بی 36 قلات کے عوام ایک ماہ سے زائد کے عرصے سے نمائندگی سے محروم ہیں۔ امن و امان کا بہانہ بنا کر سابق وزیر داخلہ کو فائدہ پہنچانے کیلئے پولنگ اسٹیشنز کو منتقل کیا جا رہا ہے۔ 7 پولنگ اسٹیشنز کو متنازعہ بنایا جا رہا ہے۔ سابق وزیر داخلہ کو یکم اگست کو ڈی نوٹیفائی کیا گیا تھا۔ مگر اس کے باوجود ساںق وزیر داخلہ اب بھی تمام مراعات اور تنخواہ وصول کر رہے ہیں۔ سابق وزیر داخلہ نے اس ماہ کی تنخواہ بھی نکالی ہے۔ انہیں تنخواہ اور مراعات دینا توہین عدالت اور غیر قانونی ہے۔ انہوں نے کہا کہ الیکشن کمیشن اور حکومت دوبارہ پولنگ کو متنازعہ نہ بنائے۔ الیکشن کمیشن قلات کے 7 پولنگ اسٹیشنز پر دوبارہ پولنگ یقینی بنائے۔