امید ہے کہ آنے والے دنوں میں مودی حکومت اپنی آمریت چھوڑ دیگی، ضیاء الرحمن برق

اسلام ٹائمز۔ اترپردیش کے ضلع سنبھل پارلیمانی حلقہ سے ممبر پارلیمنٹ ضیاء الرحمن برق نے میڈیا سے بات چیت میں کہا کہ یہ حکومت وقف بورڈ کی جائیدادوں کے بارے میں جو بل لا رہی ہے وہ غلط ہے۔ انہوں نے کہا ’’ہم اس بل کے خلاف ہی نہیں ہیں بلکہ اس بل کو منظور بھی نہیں ہونے دیں گے، ہم مشترکہ پارلیمانی کمیٹی سے رجوع کریں گے اور ہمیں امید ہے کہ اب حکومت اپنی آمریت کو ترک کرے گی۔ ضیاء الرحمن برق نے کہا کہ اترپردیش کے 513 مدارس کی پہچان ختم ہو جائے گی، ایک سوال کے جواب میں رکن اسمبلی ضیاء الرحمن برق نے کہا کہ 513 مدارس کو بند کرنا حکومت کی آمریت ہے۔ انہوں نے کہا کہ اگر حکومت ہمارے مدارس بند کرے گی تو ہم سپریم کورٹ جائیں گے لیکن مدارس کو ختم نہیں ہونے دیں گے، مدارس تعلیمی ادارے ہیں اور تعلیمی ادارے بند نہیں ہو سکتے۔

اس سوال کا جواب دیتے ہوئے کہ کیا بھارتیہ جنتا پارٹی اقلیتی مورچہ کی جانب سے مسلمانوں کی رکنیت سازی مہم چلا رہی ہے، ضیاء الرحمن برق نے کہا کہ ایک طرف بھارتیہ جنتا پارٹی مسلمانوں کو اپنے ساتھ ضم کرنے کا ڈرامہ کر رہی ہے اور دوسری طرف بھارتیہ جنتا پارٹی مسلمانوں کو ہراساں بھی کررہی ہے۔ انہوں نے کہا کہ بھارتیہ جنتا پارٹی مسلم دشمن پارٹی ہے، جو صرف دکھاوا کرتی ہے، یہ پارٹی ملک کی ترقی میں ناکام ثابت ہوئی ہے۔ ذات پات کی مردم شماری پر بات کرتے ہوئے انہوں نے کہا کہ سماج وادی پارٹی کے سربراہ اکھلیش یادو نے بھی ذات پات کی مردم شماری کی حمایت کی ہے، اگر ایسا ہوتا ہے تو بھارتیہ جنتا پارٹی کی حکومت کے لوگوں کو بھی اس کا فائدہ ہوگا۔