شرپسندوں کو دیکھنے ہی گولی مارنے کے واضح احکامات دئیے گئے ہیں، سکیورٹی ذرائع

اسلام ٹائمز۔ اسلام آباد میں رینجرز اہلکاروں کی شہادت اور کشیدہ صورتحال کے بعد فوج کو طلب کر لیا گیا۔ نجی ٹی وی نے سکیورٹی ذرائع کے حوالے سے خبر دی ہے کہ پاک فوج کو شرپسندوں کو دیکھتے ہی گولی مارنے کے احکامات دئیے گئے ہیں۔ سیکیورٹی ذرائع کے مطابق شر پسندوں کی جانب سے قانون نافذ کرنے والے اداروں پر حملہ کیا گیا ہے جس کے نتیجے میں 6 اہلکار شہید ہو گئے ہیں جن میں 2 پولیس اہلکار بھی شامل ہیں۔ سیکیورٹی ذرائع کا کہنا تھا کہ اسلام آباد میں سری نگر ہائی وے پر شر پسندوں نے ڈیوٹی پر موجود رینجرز اہلکاروں پر گاڑی چڑھا دی۔ حادثے کے نتیجے میں 4 رینجرز اور ایک پولیس اہلکار زخمی بھی ہوا، جنہیں فوری طور پر ہسپتال منتقل کردیا گیا ہے۔