مغرب کے مقابلے میں ایک اہم اقتصادی قدم

تحریر: شاہ ابراہیم

برکس اور ترقی پذیر ممالک کے وزرائے خارجہ کا اجلاس 10 اور 11 جون کو روس کے شہر نزنی نوگوروڈ میں منعقد ہوا، جس میں 10 برکس ممالک کے وزرائے خارجہ نے شرکت کی۔ ایران کی رکنیت کے بعد برکس گروپ کا یہ پہلا اجلاس ہے۔ برکس گروپ ایک بین الاقوامی گروپ ہے، جس کی قیادت ابھرتی ہوئی معاشی طاقتیں کرتی ہیں۔ BRICS برازیل، روس، بھارت، چین اور جنوبی افریقہ کی پانچ بڑی معیشتوں پر مشتمل ممالک کے ناموں کا مخفف ہے۔ ان ممالک کو دنیا کی ابھرتی ہوئی اقتصادی طاقتوں کے طور پر جانا جاتا ہے۔ 2009ء سے برکس ممالک کی حکومتیں سالانہ اجلاس منعقد کرتی رہی ہیں۔ صدر رئیسی کی حکومت میں ایران نے سنجیدگی سے اس گروپ میں شامل ہونے کا ارادہ کیا اور یہاں تک کہ بالآخر 2023ء میں برکس گروپ میں ایران کی رکنیت کا باضابطہ اعلان کر دیا گیا ہے۔

ایران کے قائم مقام وزیر خارجہ علی باقری کنی نے حالیہ اجلاس میں شرکت کی اور علاقائی اور بین الاقوامی پیش رفت کے حوالے سے اسلامی جمہوریہ ایران کے موقف کی وضاحت کرتے ہوئے شریک وزرائے خارجہ اور وفود کے سربراہان سے ملاقات اور گفتگو کی۔ روس کے شہر نزنی نوگوروڈ پہنچنے پر باقری کنی نے کہا: برکس سب سے بڑا بین الاقوامی اقتصادی گروپ ہے، جو مغرب کی یکطرفہ پسندی کے فریم ورک سے باہر اور اہم ممالک کی موجودگی کے ساتھ اپنا کردار ادا کر رہا ہے۔ اس گروپ میں اسلامی جمہوریہ ایران کی موجودگی کثیرالجہتی نظام میں ہمارے ملک کے مقام اور اہمیت کو ظاہر کرتی ہے۔ اس اجلاس میں بین الاقوامی تعلقات کے اہم مسائل، عالمی نظم و نسق کو فروغ دینے کے حل، کثیر الجہتی پلیٹ فارمز میں تنازعات کا حل، ترقی پذیر ممالک کے اثر و رسوخ کو بڑھانے پر توجہ مرکوز کرتے ہوئے کئی عالمی مسائل پر غور و خوض کیا گیا۔

برکس ممالک کے اس اجلاس میں برکس ممالک کے وزرائے خارجہ نے رکن ممالک کے درمیان اسٹریٹجک پارٹنرشپ کی ترقی و پیش رفت کے لیے روڈ میپ کا بھی تعین کیا اور 16ویں برکس سربراہی اجلاس کے انعقاد کے لیے ضروری تیاری بھی کی گئی۔ یہ اجلاس روس کے شہر کازان میں تمام رکن ممالک کے سربراہان کی موجودگی میں منعقد ہوگا۔ برکس کے رکن ممالک کے پاس دنیا کا 30% زمینی رقبہ اور دنیا کی 42% آبادی ہے اور دنیا کی بڑی جی ڈی پی ہونے کی وجہ سے ان ممالک کی ایک اہم اقتصادی پوزیشن ہے۔ حالیہ برسوں میں، خاص طور پر 13ویں ایرانی حکومت کے آغاز کے ساتھ، اسلامی جمہوریہ ایران نے برکس گروپ کی صلاحیتوں کو بروئے کار لانے اور اس کے ساتھ تعاون کے لیے منصوبہ بندی اور اہداف کا تعین کیا۔ برکس گروپ میں ایران کی رکنیت اس گروپ کے دیگر اراکین کے لیے بھی ایران کی سیاسی اور اقتصادی صلاحیتوں سے استفادہ کرنے کا ایک نیا موقع ہے۔

ایران، اپنی خاص جغرافیائی سیاسی پوزیشن کی وجہ سے، گروپ کے اراکین کے درمیان سیاسی اور اقتصادی میدان میں مزید تعاون کی بنیاد فراہم کرسکتا ہے۔ ایران، دنیا میں توانائی اور صنعتی مصنوعات کے سب سے بڑے پروڈیوسر کے طور پر، برکس گروپ کے اراکین کے ساتھ سرمایہ کاری اور مزید تعاون کے لیے ایک مناسب منڈی ثابت ہوگا۔ برکس گروپ کے اہم اہداف میں سے ایک اس گروپ کے ممبران کے لیے ایک خصوصی بینک کا قیام تھا، جس سے رکن ممالک کے درمیان مالیاتی تبادلے میں سہولت ہو۔ ایک مناسب پلیٹ فارم اور اقتصادی تعاون کا قیام برکس گروپ کے اہم مقاصد میں سے ایک رہا ہے اور ایران کی رکنیت کے ساتھ یہ عمل تیز ہو جائے گا۔ برکس، ایران کی موجودگی کے ساتھ، آزاد ممالک کے درمیان سیاسی اور اقتصادی تعاون اور شراکت داری کی علامت ہے، جو مستقبل کی ترقی اور اہداف کے لیے امریکہ اور مغرب کی طرف نہیں دیکھتے اور امریکہ اور اس کے اتحادیوں کے خلاف ایک نیا اور طاقتور اقتصادی قطب بنانے کی کوشش کر رہے ہیں۔

آرٹیکل کے اختتام میں ایران کے شہید وزیر خارجہ حسین امیر عبداللہیان کا برکس کے بارے میں ایک بیان نقل کرتے ہیں۔ ایران کا کثیرالجہتی نقطہ نظر صرف بے لگام یکطرفہ پسندی کا ردعمل نہیں ہے بلکہ ایک اسٹریٹجک انتخاب ہے۔ امیر عبداللہیان نے کہا تھا کہ ایران کی اسٹریٹجک اور منفرد جغرافیائی حیثیت ہے، توانائی کے وسیع ذخائر ہیں، خاص طور پر تیل اور گیس، سستی اور مختصر نقل و حمل اور ٹرانزٹ نیٹ ورک، نوجوان، ماہر اور ہنرمند افرادی قوت، اور جدید سائنسی اور تکنیکی کامیابیوں کا حامل ہے اور یہ قابل اعتماد ہے۔ اسی طرح دوطرفہ اور کثیر الجہتی تعاون میں موثر شراکت دار بھی ہے۔ ہمیں خوشی ہے کہ بریکس ممالک کے ساتھ دوطرفہ اقتصادی تعلقات اچھی اور سازگار حالت میں ہیں اور دونوں طرف اقتصادی اور تجارتی تعلقات کو بڑھانے کے لیے ضروری عزم موجود ہے۔

کثیرالجہتی کی پالیسی پر عمل پیرا ہونے کے سلسلے میں، جون 2022ء میں، میں نے بریکس کے پانچ رکن ممالک کے اپنے ہم منصبوں کو ایک خط بھیجا اور باہمی فائدے کی طرف اشارہ کرتے ہوئے بریکس میں شمولیت کے لیے اسلامی جمہوریہ ایران کی آمادگی اور دلچسپی کا اعلان کیا۔ ایرانی وزیر خارجہ نے کہا کہ ایران اور بریکس کے درمیان بعض شعبوں میں شراکت داری کا آغاز ہوا ہے۔ نقل و حمل کے میدان میں، شمالی-جنوبی کوریڈور، جو ہندوستان کو ایران کے راستے روس سے جوڑتا ہے، دراصل یہ برکس کی شکل میں ایک ٹرانسپورٹ پروجیکٹ کا حصہ ہے۔ امیر عبداللہیان نے مزید کہا کہ چین کو خلیج فارس اور بحیرہ عمان اور بحر ہند سے ملانے کے لیے ایران اور چین کا تعاون بھی عملی طور پر چین اور ہندوستان کو بریکس کے دو بانیوں کے طور پر جوڑتا ہے اور مشترکہ نقل و حمل کے ذریعے چین کو جوڑ سکتا ہے۔ جنوبی افریقہ اور یہاں تک کہ برازیل سے بھی جڑ سکتے ہیں۔

انہوں نے کہا کہ توانائی کے میدان میں اس کی مستحکم سلامتی کو یقینی بنانے میں، ایران بریکس کے ممبران اور اس کے مستقبل کے ممبران کے لیے ایک مطلق اضافی قدر ہے۔ بریکس کے ساتھ ایران اور توانائی کے وسائل رکھنے والے ممالک جیسے سعودی عرب، عراق اور متحدہ عرب امارات کی موجودگی اور توانائی کے شعبے میں شرکت اس اقتصادی بلاک کی پوزیشن کو مزید مضبوط کرے گی۔ ایرانی وزیر خارجہ نے کہا کہ بریکس نئے ترقیاتی بینک کا قیام موجودہ نظاموں میں خلل ڈالے بغیر عالمی مالیاتی بینکاری اور مالیاتی نظام کو درست کرنے اور مکمل کرنے میں اہم کردار ادا کرسکتا ہے۔ بریکس کی وسیع صلاحیت کو دو سمتوں میں مرکوز کیا جا سکتا ہے۔ پہلا، نئے جنوب پلس جنوب تعاون کے لیے ایک ماڈل بنانا اور دوسرا بریکس کے پانچ بانی ممالک سے باہر ڈھانچے بنا کر عالمی نظام میں موجود خامیوں کو دور کرنے کی طرف بڑھنا۔