مجلسِ علماء امامیہ کشمیر کا کاروان اخوت

اسلام ٹائمز۔ مجلس علماء امامیہ جموں و کشمیر کے کثیرالمقاصد علاقائی دوروں کا تیسرا مرحلہ ضلع بارہمولہ پہنچا۔ ضلع کے بلگام، ہائیگام، بہری پورہ، وترگام، اٹھورہ، دلنہ، قلم پورہ اور سعدہ پورہ کی مومن بستیوں کے صاحبان فکر و اندیشہ، دینی اور سماجی طور فعال افراد، تجارت پیشہ طبقہ، پڑھے لکھے لوگوں اور جوانوں کے ساتھ رابطہ بڑھانے اور ان کے سامنے مجلس علماء امامیہ جموں و کشمیر کا پروگرام پیش کرنے کی غرض سے مجلس علماء کی ایگزیکٹیو باڑی، شعبہ تبلیغات کے ارکان، مجلس کے مسؤلین زون اور سوپور کے جنرل کونسل کے ممبران پر مشتمل پندرہ سے زیادہ علماء کا وفد بلگام بارہمولہ پہنچا۔ ️وفد نے سب سے پہلے علاقہ کے سو سے زیادہ معززین کے ساتھ دو گھنٹے سے زیادہ دیر تک تبادلہ خیال کیا۔ مجلس کے جنرل کونسل کے ممبر اور بلگام کے امام جمعہ مولانا نثار حسین بلگامی نے خطبہ استقبالیہ پیش کیا اور مجلس کے وفد کا استقبال کے ساتھ علماء اور علم کی فضیلت پر تفصیلی روشنی ڈالی۔ اس کے بعد مجلس کے نائب صدر آغا سید مدثر رضوی نے تفصیل کے ساتھ علاقہ کے معززین کے سامنے مجلس علماء کی ضرورت و اہمیت، اس کے تشکیل کے مراحل اور اس کے اہداف پیش کئے۔

️اجلاس میں مؤمنین نے مجلس علماء کو مکمل تعاون دینے کا وعدہ کیا اور بہتر منصوبہ بندی کے لئے اپنی مفید آراء بھی پیش کیں۔ اس دوران علماء کرام نے حاضرین کے سوالات کے جوابات بھی دئے۔ اس پروگرام کی نظامت کے فرائض مولانا سید لیاقت موسوی انجام دے رہے تھے۔ نماز جماعت کے بعد متحدہ امامبارگاہ میں تبلیغی مجلسِ منعقد ہوئی۔ مجلس  کو مجلس علماء کے صدر مولانا شیخ غلام رسول نوری نے خطاب کیا۔ کاروان اخوت میں مولانا شیخ غلام رسول نوری، مولانا سید محمد حسین، مولانا سید اعجاز رضوی، مولانا سید لیاقت موسوی، مولانا آغا سید محمد رضوی، مولانا آغا سید مدثر رضوی، مولانا شبیر احمد صوفی، مولانا سید مظفر رضوی، مولانا نثار حسین بلگامی، مولانا یاسین حسین، مولانا حکیم سجاد، مولانا مقبول حسین جو، مولانا محمد مقبول حجام، مولانا بشیر احمد بوٹو، مولانا آغا سید عابد حسینی، مولانا بشیر احمد بٹ، مولانا غلام حسین متو شریک تھے۔ پروگرام کے اختتام پر مجلس علماء کے سیکرٹری جنرل مولانا سید اعجاز رضوی نے مجلس علماء کے زون بارہمولہ کے علماء، علاقہ کے جوانوں اور معزز مومنین کے علاوہ بلگام کے جوانوں، مومنین و مومنات کا شکریہ ادا کیا۔