دستہ امامیہ کراچی کے تحت محفل یاد شہداء بیاد شہید حسن نصراللہ، ویڈیو رپورٹ

متعلقہ فائیلیںخصوصی رپورٹ

دستہ امامیہ آئی ایس او کراچی ڈویژن کی جانب سے شہد مقاومت شہید سید حسن نصراللہ و شہداء مقاومت کی عظیم قربانیوں کو خراج عقیدت پیش کرنے کیلئے ایک شاندار محفل یاد شہداء بیاد شہید مقاومت شہید سید حسن نصراللہ کا اہتمام کیا گیا۔ معروف شاعر فراست رضوی کی زیر صدارت محفل یاد شہداء کا انعقاد مسجد سید الشہداء، اسلامک ریسرچ سینٹر میں کیا گیا۔ محفل یاد شہداء کے اہم شعراء میں میر سجاد میر، ڈاکٹر جعفر عسکری، قیصر عباس قیصر، ڈاکٹر زین اعظمی، زین جعفری، اختر کلیم رضوی، یاسر عباس شاہ، فرحان جعفری پیکر، ابوزر حسنین، زیشان حیدر، حمزہ عابدی و دیگر شامل تھے۔ اس موقع پر شہر قائد کے مشہور و معروف منقبت خواں حضرات مختار فتح پوری، شجاع رضوی، حیدر مرزا، وسیم الحسن عابدی، عاطر حیدر، عون علی جعفری، شبیہ حیدر، جری سجاد نقوی، کمیل حسن نے ترانہ شہادت و منقبت پیش کیں۔ محفل مشاعرہ میں نظامت کے فرائض سچل شیرازی و اریب ہادی نے انجام دیئے۔

محفل یاد شہداء میں شریک شعراء نے شہید مقاومت شہید سید حسن نصراللہ سمیت شہداء مقاومت کو منظوم خراج عقیدت پیش کرتے ہوئے ان کے ساتھ مکمل یکجہتی کا اظہار کیا۔ شعراء کرام نے فلسطین و لبنان کے مظلوم عوام کے حق میں غاصب اسرائیلی حکومت اور اس کے ہمنوا امریکی و مغربی ممالک کے انسانیت سوز مظالم کے خلاف صدائے احتجاج بلند کی۔ مشاعرے کے آخر میں شرکاء نے فلسطینی و لبنانی مجاہدین اور تحریک آزادی فلسطین کی کامیابی کیلئے دعا بھی کی، محفل یاد شہداء کا اختتام دعائے سلامتی امام زمانہ (ع) سے کیا گیا۔ قارئین و ناظرین محترم آپ اس ویڈیو سمیت بہت سی دیگر اہم ویڈیوز کو اسلام ٹائمز کے یوٹیوب چینل کے درج ذیل لنک پر بھی دیکھ اور سن سکتے ہیں۔ (ادارہ)
https://www.youtube.com/c/IslamtimesurOfficial