مودی حکومت وقف بل میں مداخلت سے مسلمانوں کو ناقابل تلافی نقصان پہنچانا چاہتی ہے، ایڈووکیٹ شرف الدین

اسلام ٹائمز۔ وقف ترمیمی بل کو لے کر سیاسی سماجی اور ملی حلقوں سے سخت مخالفت کی جارہی۔ آج اس معاملے کو لیکر سوشل ڈیموکریٹک پارٹی آف انڈیا کی جانب سے پریس کانفرنس کر کے وقف ترمیمی بل شدید مخالفت کی گئی۔ نئی دہلی حضرت نظام الدین میں واقع سوشل ڈیموکریٹک آف انڈیا کے ہیڈ آفس میں منعقد پریس کانفرنس میں پارٹی کے نائب صدر ایڈووکیٹ شرف الدین نے کہا کہ مودی حکومت نے سیاسی اور نظریاتی طور پر مسائل کو قالین کے نیچے سے اٹھانے کی عادت کے مطابق سماجی انصاف سے ملک کے اجتماعی ضمیر کی توجہ ہٹانے کے لئے جولائی 2024ء میں پارلیمنٹ میں وقف ترمیمی بل جو فی الحال مشترکہ پارلیمانی کمیٹی کے سامنے زیر التوا ہے اس کو عجلت میں پیش کیا ہے۔

ایڈووکیٹ شرف الدین نے کہا کہ سوشل ڈیموکریٹک پارٹی نے وقف ترمیمی بل 2024ء کی دفعات کے ساتھ ساتھ در پردہ مقصد کا بھی بخوبی مطالعہ کیا ہے۔ انہوں نے کہا کہ شروع میں کہا گیا کہ بی جے پی نے آئین کی خلاف ورزی کی ہے تاکہ ملک میں وقف کے حالات کو بہتر بنانے کے لئے ’کے رحمن‘ کی قیادت والی بی جے پی رپورٹ کی سفارشات کو لاگو کیا جا سکے۔ انہوں نے کہا کہ ایسا لگتا ہے کہ مودی حکومت نے پچھلے دو ادوار میں اسے جان بوجھ کر چھوڑ دیا تھا ور اب وقف کے حالات میں بہتری کی آڑ میں وقف کے نظام سے مسلمانوں کو پہنچنے والے فوائد چھیننا اور مسلمانوں کے اثاثوں کو ناقابل تلافی نقصان پہنچانا چاہتی ہے۔

ایڈووکیٹ شرف الدین نے کہا کہ ایک طویل عرصے سے یہ پروپیگنڈہ کیا جارہا ہے کہ ہندوستان میں وقف کا وجود سیکولر اقدار سے مطابقت نہیں رکھتا اور اسے ہٹا دیا جانا چاہیئے۔ انہوں نے کہا کہ ایک رائے یہ ہے کہ بی جے پی نے ان متعصب عناصر کو خوش کرنے کے لئے سیاسی فائدے حاصل کرنے کے لئے متنازعہ بل کو پیش کیا ہے۔ انہوں نے کہا کہ موجودہ قوانین اور این ڈی اے حکومت کے پیش کردہ بل کے محض تقابلی جائزہ سے بل کی دفعات کی تعداد کے پیش نظر یہ امتیازی سلوک ظاہر ہوتا ہے جو عام اصولوں کے ساتھ ساتھ ملک کے طے شدہ قانون سے واضح طور پر متصادم ہیں۔

ایڈووکیٹ شرف الدین نے کہا کہ وقف ادارہ ایک ایسا کارآمد فلاحی ادارہ ہے جو ذات پات اور برادری سے بالاتر ہوکر خدمت خلق کے عظیم مقصد کی خدمت کرتا ہے اور اس ادارے کے فروغ کے لئے تمام کوششیں کی جانی چاہئیں تاکہ اس کو نام نہاد اکثریتی مہم کے تحت کمزور نہ کیا جائے۔ انہوں نے مزید کہا کہ یہ احترام کے ساتھ مزید یاد دلایا جاتا ہے کہ وقف کا مقصد ہمیشہ عوامی افادیت اور انسانیت کا فائدہ رہا ہے۔ سوشل ڈیموکریٹک پارٹی کے نائب صدر نے کہا کہ انکی پارٹی موجودہ وقف ترمیمی بل کی مخالفت کرتی ہے اور اس کے لئے مہم چلائی جائے گی۔