اسلام ٹائمز۔ سابق وزیر خزانہ اور عوام پاکستان پارٹی کے رہنما مفتاح اسماعیل نے کہا ہے کہ حکومت آئینی ترمیم کی بجائے بجلی بلوں کو کم کرنے پر توجہ دے۔ خصوصی گفتگو کرتے ہوئے مفتاح اسماعیل نے حکومت کو مشورہ دیا کہ حکومت آئینی ترامیم کے بجائے بجلی بلوں کو کم کرنے پر توجہ دے تاکہ مہنگائی میں پسے پاکستان کے عوام کو ریلیف مل سکے۔ انہوں نے کہا کہ آئینی عدالت کے لیے ترمیم پر حکومت کی نیت کچھ اور ہے، وہ فرد واحد کے لیے یہ ترمیم کر رہی ہے، فرد واحد کے لیے ترامیم عدالتی نظام میں پیچیدگیاں پیدا کرے گی، حکومت ان ترامیم کے بعد ججز کو اپنی مرضی سے ٹرانسفر کر سکے گی۔ انہوں نے کہا کہ این ایف سی فارمولے کو بھی از سرنو دیکھنے کی ضرورت ہے، اس میں اخراجات بالخصوص سود اور دفاع کے اخراجات پر بات ہونی چاہیئے۔