جے یو آئی (ف) کے 15 ارکان کو پارٹی سرگرمیوں میں حصہ لینے سے روک دیا گیا

اسلام ٹائمز۔ جمعیت علمائے اسلام(ف) لاہور کی تنظیم میں اختلافات کا معاملہ، جمعیت علماء اسلام کے نومنتخب امیر مولانا محب النبی نے پندرہ معطل کیے گئے پارٹی رہنماوں اور کارکنان کی پارٹی سرگرمیوں میں شرکت کا نوٹس لے لیا۔ جمعیت علماء اسلام کے نومنتخب امیر مولانا محب النبی نے پندرہ معطل کیے گئے پارٹی رہنماوں اور کارکنان کی پارٹی سرگرمیوں میں شرکت سے روک دیا۔ امیر لاہور نے باقاعدہ طور پر امیر جماعت مولانا فضل الرحمن کو معطل کیے گئے اراکین کی پارٹی سرگرمیوں میں بنا دعوت کے شرکت سے آگاہ کر دیا۔

ذرائع کے مطابق مولانا فضل الرحمن کی جانب سے ان معطل اراکین کو پارٹی کے کسی بھی اجلاس میں شرکت کو روکنے کے احکامات جاری کر دیئے۔ ان پندرہ اراکین کو پارٹی ڈسپلن کی خلاف ورزی پر معطل کیا گیا تھا اور لاہور کے انٹرا پارٹی الیکشن کے دوران الیکشن کمشنر جے یو آئی پنجاب نے ان 15 اراکین کو جے یو آئی سے 5 سال کیلئے معطل کیا تھا۔ معطل کیے جانیوالے اراکین میں سابق امیر لاہور بلال احمد میر، حافظ فہیم الدین، سلیم اللہ قادری، افضل خان، بلال درانی، مفتی عبدالحفیظ، ندیم چودھری، عرفان حیدر و دیگر شامل ہیں۔