حماس ترجمان خالد القدومی کی علی خورشیدی اور دیگر ایم کیو ایم رہنماؤں سے ملاقات

اسلام ٹائمز۔ متحدہ قومی موومنٹ کے سندھ اسمبلی میں قائد حزبِ اختلاف علی خورشیدی سے حماس کے ترجمان برائے وسطی ایشیا ڈاکٹر خالد القدومی نے ملاقات کی۔ علی خورشیدی اور دیگر ایم کیو ایم اراکینِ سندھ اسمبلی عبدالوسیم، راشد خان، شارق جمال، نصیر احمد، نجم مرزا، مہیش ہسیجا، ڈاکٹر فوزیہ حمید، کرن مسعود، سکندر خاتون، فہیم احمد پٹنی اور انجینئر صابر حسین قائم خانی نے ایوان آمد پر ڈاکٹر خالد القدومی کا پرتپاک خیر مقدم کیا۔ ملاقات میں پاکستان فلسطین دوطرفہ تعلقات و تعاون اور موجودہ صورتحال سمیت باہمی دلچسپی کے امور پر سیر حاصل گفتگو کی گئی۔ ڈاکٹر خالد القدومی نے ایم کیو ایم اراکینِ اسمبلی کی جانب سے شاندار استقبال پر شکریہ ادا کیا۔ ڈاکٹر خالد قدومی نے غزہ میں بحالی کے کاموں کے بارے میں تفصیل سے بتایا۔ اس موقع پر علی خورشیدی کا کہنا تھا کہ پاکستان اسرائیلی بربریت اور ظلم کے خلاف فلسطینیوں کی ہر ممکن حمایت جاری رکھے گا، اہل فلسطین کے حق میں پاکستانی عوام بلا تفریق ہم آواز ہیں، فلسطین کی عوام نے اپنی استقامت اور بے مثال قربانیوں سے عالمی ضمیر کو جھنجھوڑ کر رکھ دیا ہے۔