صوبائی وزیر علی مدد جتک کی اسمبلی رکنیت معطل، 15 پولنگ اسٹیشنز پر دوبارہ انتخابات ہونگے

اسلام ٹائمز۔ الیکشن ٹربیونل نے بلوچستان کے صوبائی وزیر علی مدد جتک کے خلاف دائر انتخابی عذرداری کا فیصلہ سناتے ہوئے پی بی 45 کے 15 پولنگ اسٹیشنز پر دوبارہ الیکشن کرانے کا حکم دے دیا۔ بلوچستان کے حلقے پی بی 45 سے کامیاب پیپلز پارٹی کے رکن علی مدد جتک کامیاب قرار پائے تھے، جن کی رکنیت ختم کرتے ہوئے ان کی وزارت کا قلمدان بھی واپس لینے کا حکم دیا گیا ہے۔ جمعیت علما اسلام کے میر عثمان پرکانی کی جانب سے علی مدد جتک کی کامیابی کو چیلنج کیا گیا تھا۔ الیکشن ٹربیونل کے جج جسٹس عبداللہ بلوچ نے آج انتخابی عذرداری پر محفوظ شدہ فیصلہ سناتے ہوئے علی مدد جتک کی رکنیت ختم کرنے کے ساتھ ان کی وزارت کا قلمدان بھی واپس لینے کی ہدایت کی ہے۔