جموں و کشمیر اسمبلی انتخابات کے چلتے انجینئر رشید اور جماعت اسلامی کشمیر کے درمیان اتحاد

اسلام ٹائمز۔ جموں و کشمیر میں اسمبلی انتخابات کے پہلے مرحلے کی ووٹنگ 18 ستمبر کو ہونے والی ہے۔ اس سے ٹھیک پہلے رکن پارلیمنٹ انجینئر رشید کی عوامی اتحاد پارٹی اور کالعدم جماعت اسلامی کشمیر نے اتحاد کے ساتھ الیکشن لڑنے کا فیصلہ کیا ہے۔ عوامی اتحاد پارٹی کے سربراہ انجینئر رشید اور کالعدم تنظیم کے پینل کے سربراہ غلام قادر وانی نے اتوار کو سرینگر میں اتحاد کا اعلان کیا۔ کالعدم جے ای آئی کے پینل کے سربراہ شمیم ​​احمد ٹھوکر نے عوامی اتحاد پارٹی کے ساتھ اتحاد کی تصدیق کی۔ انہوں نے بتایا ’’ہم نے آج سرینگر میں ایک میٹنگ کی، جس میں ہم نے انجینئر رشید کی عوامی اتحاد پارٹی کے ساتھ انتخابات سے قبل اتحاد کرنے کا فیصلہ کیا‘‘۔ میٹنگ کے بعد جاری کردہ ایک بیان میں عوامی اتحاد پارٹی نے کہا کہ ہمارا مقصد دونوں کے امیدواروں کی شاندار جیت کو یقینی بنانا ہے۔ یہ یقینی بنانا ہے کہ جموں و کشمیر کے لوگوں کے پاس مضبوط نمائندے ہوں جو اپنے جذبات اور خواہشات کا اظہار کر سکیں۔ یہ تعاون جموں و کشمیر میں امن، انصاف اور یہاں کے لوگوں کو سیاسی طور پر بااختیار بنانے کی جانب ایک اہم قدم ہے۔

عوامی اتحاد پارٹی وادی کشمیر میں 30 سے ​​زائد نشستوں پر الیکشن لڑ رہی ہے، جب کہ کالعدم جماعت اسلامی کشمیر آزاد امیدواروں کی حمایت کر رہی ہے جو پہلے اس کے رکن تھے۔ جماعت اسلامی کشمیر نے جنوبی کشمیر کے پلوامہ، کولگام، جین پورہ اور دیوسر اسمبلی حلقوں میں اپنے امیدوار کھڑے کیے ہیں، جہاں پہلے مرحلے میں 18 ستمبر کو ووٹنگ ہونی ہے۔ اس کے علاوہ جے ای آئی نے بیرواہ، لنگیٹ، بانڈی پورہ، بارہمولہ، سوپور اور رفیع آباد اسمبلی حلقوں میں بھی امیدوار کھڑے کئے ہیں۔ لنگیٹ انجینئر رشید کا آبائی حلقہ ہے، جس کی وہ جموں و کشمیر اسمبلی میں دو مرتبہ نمائندگی کر چکے ہیں۔ اسمبلی انتخابات میں انجینئر رشید نے اپنے بھائی شیخ خورشید کو میدان میں اتارا ہے جو سرکاری استاد تھے لیکن نوکری چھوڑ چکے ہیں۔

بیان میں کہا گیا ہے کہ اس اتحاد کے تحت ان حلقوں میں دوستانہ مقابلہ کرنے پر اتفاق کیا گیا ہے جہاں اے آئی پی اور جماعت اسلامی کشمیر نے امیدوار کھڑے کئے ہیں، خاص طور پر لنگیٹ، دیوسر اور جین پورہ جیسے حلقوں میں۔ دیگر حلقوں میں وہ مشترکہ امیدوار کھڑا کریں گی۔ بیان میں کہا گیا کہ دونوں جماعتوں نے مسئلہ کشمیر کو حل کرنے اور خطے میں دیرپا اور باوقار امن کو فروغ دینے میں اتحاد کی اہمیت پر زور دیا۔ انہوں نے علاقائی اور بین الاقوامی سطح پر تیزی سے ابھرتے ہوئے سیاسی منظر نامے پر روشنی ڈالی اور اس بات پر زور دیا کہ جماعت اسلامی اور اے آئی پی دونوں ہی غیر فعال مبصر بن کر نہیں رہ سکتے۔ حالیہ دنوں میں مرکزی حکومت کی جانب سے جماعت اسلامی جموں و کشمیر سے پابندی ہٹانے کے امکانات بڑھ گئے۔ جماعت اسلامی کشمیر کے لیڈروں نے پارلیمانی انتخابات کی ووٹنگ میں بھی حصہ لیا اور اسمبلی انتخابات میں بھی آزاد امیدوار کھڑے کر کے انتخابات میں حصہ لے رہی ہے۔