ملتان، ایم ڈبلیو ایم عزاداری ونگ کا استقبالیہ کیمپ

اسلام ٹائمز۔ مجلس وحدت مسلمین عزاداری ونگ ضلع ملتان کے زیراہتمام عید میلادالنبی کے موقع پر چوک کمہارانوالہ پر جلوس کو خوش آمدید کہنے کے لیے استقبالیہ کیمپ لگایا گیا اور پانی کی سبیل کا اہتمام بھی کیا گیا۔ ماتمی سنگت شہنشاہ وفا کی معاونت سے لگنے والی سبیل کا مجلس وحدت مسلمین عزاداری ونگ جنوبی پنجاب کے صوبائی جنرل سیکرٹری عون رضا انجم، ضلعی نائب صدر ملک عمران حیدر، تحصیل صدر سٹی ڈاکٹر شاہد حسین، رہنما ایم ڈبلیو ایم حکیم غلام شبیر اور دیگر نے دورہ کیا۔ جلوس ہائے میلاد پر پھولوں کی پتیاں نچھاور کی گئیں اور پھولوں کے ہار سمیت دستار بندی کرائی گئی۔ صوبائی جنرل سیکرٹری عون رضا انجم نے کہا کہ 12 ربیع الاول سے 17 ربیع الاول تک میلاد کی محافل کا مقصد اتحاد و وحدت کی فضا کو سازگار کرنا ہے اور ہفتہ وحدت منا کر عالم اسلام کے دشمن کو واضح پیغام دینا ہے کہ یہ ملک عاشقان رسول و آل رسول کا ہے۔