وزیراعلٰی پختونخوا کا خیبر ٹیچنگ ہسپتال دورہ

اسلام ٹائمز۔ وزیراعلٰی خیبر پختونخوا محمود خان نے خیبر ٹیچنگ ہسپتال کا اچانک دورہ کیا۔ وزیراعلٰی او پی ڈی سمیت ہسپتال کے مختلف وارڈز میں گئے، مریضوں سے بات چیت کی اور انکی خیریت دریافت کی۔ انہوں نے ہسپتال کے کاؤنٹر پر پرچی سسٹم کو چیک کیا اور مریضوں کو ادویات کی فراہمی کا جائزہ بھی لیا۔ وزیراعلٰی محمود خان نے کہا کہ میرے دورے کا بنیادی مقصد مریضوں کی مشکلات اور تکالیف کا جائزہ لینے اور انہیں دور کرنا ہے۔ انہوں نے کہا کہ زیادہ سے زیادہ وسائل کو بروئے کار لاتے ہوئے صوبائی حکومت صحت کے شعبے کو مزید بہتری کی طرف لے جانا چاہتی ہے اور مریضوں کو تمام سہولیات یکساں مہیا کی جائیں گی۔ وزیراعلٰی نے کہا کہ صحت و تعلیم ہماری ترجیحات میں شامل ہیں، میں خود ان شعبوں کو مانیٹر کر رہا ہوں۔ ایک مریض کی شکایت پر محمود خان نے فوراً اسے ویل چیئر فراہم کرنے کی ہدایت کی۔ دورے کے دوران وزیر اطلات شوکت یوسفزئی بھی وزیراعلٰی کے ہمراہ تھے۔