حزب اللّٰہ کا شہید حسن نصراللّٰہ کی تدفین 23 فروری کو لبنان میں کرنے کا اعلان

اسلام ٹائمز۔ لبنان کی اسلامی مزاحمتی تنظیم حزب اللّٰہ نے اپنے شہید سربراہ سید حسن نصراللّٰہ کی تدفین 23 فروری کو لبنان میں کرنے کا اعلان کردیا۔ غیر ملکی میڈیا رپورٹ کے مطابق حزب اللّٰہ کے موجودہ سربراہ شیخ نعیم قاسم کا کہنا ہے کہ سید حسن نصراللّٰہ اور سید ہاشم صفی الدین کی نماز جنازہ عوامی اجتماع میں ادا کی جائے گی۔ انکا کہنا تھا کہ سید ہاشم صفی الدین کی بطور حزب اللّٰہ سیکریٹری جنرل کے عہدے کے ساتھ تدفین کی جائے گی۔ واضح رہے کہ اسرائیل نے حزب اللّٰہ سربراہ سید حسن نصراللّٰہ کو 27 ستمبر کو بیروت میں شہید کیا تھا جبکہ اس کے ایک ہفتے بعد سید ہاشم صفی الدین کو شہید کیا گیا تھا۔ خبر ایجنسی کی رپورٹ کے مطابق اسرائیل لبنان جنگ کے باعث سید حسن نصر اللّٰہ اور سید ہاشم صفی الدین کی امانتاً تدفین کی گئی تھی۔