مقبوضہ فلسطین کے شمال میں واقع صیہونی اڈوں پر حزب اللہ لبنان کا میزائل حملہ

اسلام ٹائمز۔ عرب میڈیا کے مطابق مقبوضہ فلسطین کے شمال میں واقع غیرقانونی و سفاک صیہونی رژیم کے اہم فوجی ٹھکانوں کے خلاف انجام پانے والے لبنانی مزاحمتی تحریک حزب اللہ کے تازہ میزائل حملوں کے نتیجے میں متعدد غیرقانونی یہودی بستیوں میں خطرے کے الارم بج اٹھے اور بجلی منقطع ہو گئی۔
  ادھر اسرائیلی فوج نے بھی اعلان کیا کہ شہر صفد پر تقریباً 20 پروجیکٹائل فائر کئے گئے ہیں تاہم اس بیان میں دعوی کیا گیا ہے کہ اس حملے سے کوئی نقصان نہیں ہوا۔

علاوہ ازیں صیہونی فوج کے قریبی ٹیلیویژن چینل کان نے اس حملے کے باعث شہر صفد کو پہنچنے والے نقصان کی تصاویر شائع کی ہیں جبکہ صیہونی اخبار ٹائمز آف اسرائیل نے اطلاع دی ہے کہ صیہونی فائر فائٹر عملہ مذکورہ حملے کے باعث بھڑک اٹھنے والی وسیع آگ پر قابو پانے کی کوشش کر رہا ہے!