امریکی انتخابی عمل میں ایرانی مداخلت سے متعلق امریکی دعوی ناصر کنعانی کیجانب سے مسترد

اسلام ٹائمز۔ امریکی اٹارنی جنرل کے اس دعوے پر کہ جس میں ایران سمیت بعض دیگر ممالک کے اقدامات سے امریکی انتخاباتی عمل و نتائج کے متاثر ہونے کا دعوی کیا گیا تھا، ایرانی وزارت خارجہ کے ترجمان ناصر کنعانی نے تاکید کی ہے کہ امریکی حکام، اپنی سرحدوں سے باہر موجود فریقوں پر الزام تراشی کے ذریعے اپنے ملک میں موجود گہری تقسیم اور بھیانک مسائل کو کسی صورت درست نہیں کر سکتے!
  ایرانی وزارت خارجہ کے ترجمان نے کہا کہ امریکی حکومت جو دوسرے آزاد ممالک کے اندرونی معاملات میں غیر قانونی مداخلتوں میں پیش پیش ہے اور جس کے سیاہ ریکارڈ میں اس طرح کے تباہ کن اقدامات کی ایک طویل فہرست موجود ہے؛ اپنے اندرونی مسائل و بحرانوں کے حوالے سے دوسرے ممالک کو مورد الزام ٹھہراتے ہوئے؛ آزاد ممالک کے اندرونی معاملات میں اپنی مداخلت و غیر قانونی رویے کے سیاہ ریکارڈ پر کسی صورت پردہ نہیں ڈال سکتی!

واضح رہے کہ بدھ کی شام امریکی اٹارنی جنرل میرک گارلینڈ نے دعوی کیا تھا کہ ہم روس، چین یا کسی بھی دوسرے غیر ملکی کھلاڑی جیسا کہ ایران کی کوششوں کے خلاف ردعمل ضرور ظاہر کریں گے اور ان کا مقابلہ کریں گے، جو امریکی انتخاباتی عمل میں مداخلت کرنا چاہتے ہیں!