“Mələklər şəhəri” cəhənnəmə çevrildi

Teleqraf.com xəbər verir ki, güclü külək səbəbindən təsirini artıran yanğın sürətlə böyüyərək, Hollivud ulduzlarının evləri və dəbdəbəli malikanələr də daxil olmaqla 10 min tikilini məhv edib.

Los-Anceles meri Karen Bass genişmiqyaslı yanğınlara küləyin səbəb olduğunu deyib.

Los-Anceles Xilasetmə Xidmətinin rəisi Kristin Krouli də yanğını hələ də nəzarət altına ala bilmədiklərini açıqlayıb. Onun sözlərinə görə, alovlar 27 min hektardan çox ərazini yandırıb, bu da təxminən 20 min futbol sahəsinə bərabərdir.

Bütöv bir şəhəri külə çevirən yanğına bir qığılcımın səbəb olduğu bildirilir.

Los-Anceles Yanğınlarla Mübarizə Departamenti ştatlardan gələnlər və federal yardımlar da daxil olmaqla, ümumilikdə 12 helikopter və 6 təyyarə ilə yanğının söndürülməsi işlərinin davam etdiyini bəyan edib.

BBC-nin məlumatına görə, aidiyyəti qurumlar yanğınlarla mübarizəyə 4700 zabit, 1800 məhbus könüllü də cəlb edilib.

Los-Anceles polisi şəhərin Vudlənd Hilz rayonunda yanğın törətməkdə şübhəli bilinən bir şəxsi saxladıqlarını açıqlayıb. İddiaya görə, yanğın həmin şəxsin ocaq qalamaq cəhdləri ilə başlayıb.

Polis istintaqın davam etdiyini və şübhəlinin hazırda hər hansı yanğınla əlaqəsini təsdiq edə bilmədiklərini vurğulayıb.

Los-Anceles hüquq-mühafizə orqanları həftənin əvvəlindən başlayan yanğınlardan sonra 20 nəfərin talançılıq ittihamı ilə nəzarətə alındığını açıqlayıb.

Səlahiyyətlilər 180 min nəfər üçün təxliyə əmri, təxminən 200 min nəfər üçün də təxliyə xəbərdarlığı veriblər. Rəsmilər davam edən yanğınlar səbəbindən şəhərdə təbii qazın kəsildiyini, nəqliyyat və kanalizasiya sistemlərinə ciddi ziyan dəydiyini söyləyiblər.

Aidiyyəti qurumlar vətəndaşlara suyu qaynadıb içmək barədə də xəbərdarlıq edib.

Los-Anceles ştatının rəhbərliyi günlərdir davam edən yanğınlar nəticəsində 10 nəfərin həyatını itirdiyini açıqlayıb.

ABŞ Prezidenti Bayden Los-Ancelesdəki yanğınlarla mübarizə ilə bağlı Ağ Evdə mətbuat konfransı keçirib. Bayden yanğınlarla mübarizə üçün bütün imkanlarını səfərbər etdiklərini deyib.