QR Code

بن گورین ایئرپورٹ کو ہائپر سونک میزائل کیساتھ نشانہ بنایا ہے، یمن

27 Dec 2024 16:40

یمنی مسلح افواج کے ترجمان نے اعلان کیا ہے کہ ملکی افواج نے متعدد کامیاب آپریشنز کے ذریعے غاصب اسرائیلی رژیم اور اسکے مذموم اتحادیوں کے حملوں کا کاری جواب دیا ہے

اسلام ٹائمز۔ یمنی مسلح افواج کے ترجمان بریگیڈیئر جنرل یحیی السریع نے اعلان کیا ہے کہ ملکی میزائل فورس نے اپنے ایک منفرد آپریشن میں فلسطین 2 ہائپرسونک میزائل کے ذریعے مقبوضہ یافا (تل ابیب) کے علاقے واقع بن گورین ہوائی اڈے کو کامیابی کے ساتھ نشانہ بنایا ہے۔ جنرل یحیی السریع نے کہا کہ غاصب اسرائیلی رژیم کی خاموشی اور شدید سنسر سے قطع نظر یمنی میزائل نے اپنے ہدف کو انتہائی درستگی کے ساتھ نشانہ بنایا اور اس کارروائی کے نتیجے میں متعدد غیر قانونی اسرائیلی آبادکاروں کے ہلاک و زخمی ہونے کے ساتھ بن گورین ہوائی اڈے کا فلائٹ آپریشن بھی معطل ہو کر رہ گیا ہے۔

یمنی مسلح افواج کے ترجمان نے یہ اعلان بھی کیا کہ ملکی ڈرون فورس نے اپنے ایک آپریشن میں یافا کے ہی علاقے میں "ایک اہم صیہونی ہدف" کو بھی کامیابی کے ساتھ نشانہ بنایا ہے۔ انہوں نے کہا کہ علاوہ ازیں متعدد یمنی ڈرون طیاروں نے جزیرہ سقطری کے مشرق میں بحیرہ مکران میں واقع سانٹا ارسلا (Santa Ursula) نامی صیہونی بحری جہاز کو بھی نشانہ بنایا ہے جبکہ اس آپریشن کے دوران داغے جانے والے تمام خودکش ڈرون طیارے اپنے اہداف پر انتہائی درستگی کے ساتھ جا بیٹھے۔ اس بات پر تاکید کرتے ہوئے کہ مذکورہ بحری جہاز کو، مقبوضہ فلسطین جانے کے لئے مذکورہ سمندر پار کرنے کی ممانعت پر یمنی مسلح افواج کی جانب سے خبردار کئے جانے کے بعد نشانہ بنایا گیا ہے، انہوں نے اعلان کیا کہ صنعاء و الحدیدہ میں عام شہری مراکز پر ہونے والے غاصب صیہونی رژیم کے حملوں سے فلسطینیوں کی حمایت پر مبنی یمنی عزم میں مزید اضافہ ہو گا۔

خبر کا کوڈ: 1180810