QR Code
ایران کا اسماعیل ہنیہ کے قتل پر اسرائیل کیخلاف جوابی کارروائی کا عندیہ
25 Dec 2024 10:38
اقوام متحدہ میں ایرانی سفیر امیر سعید ایروانی نے یو این سیکریٹری جنرل کو خط میں لکھا ہے کہ اسرائیل نے اسماعیل ہنیہ کو قتل کرکے سنگین جرم کیا اور اسکی باضابطہ ذمے داری قبول کی۔ انہوں نے کہا کہ ایران اسرائیل پر جوابی کارروائی کا حق محفوظ رکھتا ہے۔
اسلام ٹائمز۔ اسلامی جمہوریہ ایران نے فلسطینی مزاحمتی تنظیم حماس کے سربراہ اسماعیل ہنیہ کے قتل پر اسرائیل کے خلاف جوابی کارروائی کا عندیہ دے دیا۔ اقوام متحدہ میں ایرانی سفیر امیر سعید ایروانی نے سیکریٹری جنرل یو این انتونیو گوتریس کو خط لکھ دیا۔ ایرانی سفیر امیر سعید نے خط میں لکھا ہے کہ اسرائیل نے اسماعیل ہنیہ کو قتل کرکے سنگین جرم کیا اور اس کی باضابطہ ذمے داری قبول کی۔ انہوں نے کہا کہ ایران اسرائیل پر جوابی کارروائی کا حق محفوظ رکھتا ہے۔ امیر سعید کا کہنا ہے کہ اسرائیل عالمی اور علاقائی امن و سلامتی کے لیے سنگین خطرہ ہے۔
واضح رہے کہ اسرائیل نے پہلی بار عوامی سطح پر فلسطینی مزاحمتی تنظیم حماس کے سربراہ اسماعیل ہنیہ کو قتل کرنے کا اعتراف کر لیا ہے۔ عرب میڈیا کے مطابق اسرائیلی وزیرِ دفاع اسرائیل کاٹز نے کہا تھا کہ حوثیوں کو واضح پیغام دینا چاہتا ہوں، ہم نے حماس کو شکست دی ہے، حزب اللّٰہ کو شکست دی ہے، ایران کے دفاعی اور پیداواری نظام کو نقصان پہنچایا ہے۔ انہوں نے کہا تھا کہ ہم نے شام میں بشار الاسد کی حکومت کو گرا دیا ہے، حوثیوں کے اسٹریٹجک انفرا اسٹرکچر کو نقصان پہنچائیں گے۔
خبر کا کوڈ: 1180355