اسلام ٹائمز - حفیظ الرحمن کی آمریت سے نون لیگ تباہ ہو گئی، جعفر اللہ خان

حفیظ الرحمن کی آمریت سے نون لیگ تباہ ہو گئی، جعفر اللہ خان

سکردو میں پریس کانفرنس کرتے ہوئے نون لیگ کے رہنما نے کہا کہ تاحیات قائد اور شہنشاہ نواز شریف ہیں حفیظ نہیں، یہ نواز شریف کو بائی پاس کرنا چاہتے ہیں، ان کی انہی حرکتوں کی وجہ سے 2020ء کے الیکشن میں ہماری جماعت کو ناکامی کا سامنا کرنا پڑا۔

اسلام ٹائمز۔ سابق ڈپٹی سپیکر اور نون لیگ گلگت بلتستان کے رہنما جعفر اللہ خان نے کہا ہے حفیظ الرحمن کی شہنشاہیت کی وجہ سے پارٹی تباہ ہو گئی اور الیکشن میں صرف دو سیٹیں ملیں۔ سکردو میں پریس کانفرنس کرتے ہوئے انہوں نے کہا کہ مسلم لیگ نون کسی تعارف کی محتاج نہیں، یہ سب سے مقبول جماعت ہے، مگر حفیظ الرحمن نے سب کا راستہ روکا ہوا ہے، یہ سمجھتے ہیں کہ پارٹی ان کی جاگیر ہے۔ انہوں نے کہا کہ گلگت بلتستان کے مسائل سنگین ہوگئے ہیں، یہاں بجلی تک نہیں ہے، ہم نے اپنے دور حکومت میں اہم شاہراہیں بنائیں، وزیر اعظم شہباز شریف نے حالیہ دورے میں سو میگاواٹ سولر انرجی دینے کا اعلان کیا۔