QR Code

قاضی فائز عیسیٰ 25 اکتوبر تک چیف جسٹس ہیں، اعظم نذیر تارڑ

18 Sep 2024 22:19

اسلام آباد میں صحافیوں سے گفتگو میں وفاقی وزیر قانون کا کہنا تھا کہ واضح کرچکا ہوں کہ 25 اکتوبر تک قاضی فائز عیسیٰ چیف جسٹس پاکستان ہیں، 26 اکتوبر کو سپریم کورٹ کے سینیئر ترین جج چیف جسٹس بن جائیں گے۔

اسلام ٹائمز۔ وفاقی وزیر قانون سینیٹر اعظم نذیر تارڑ نے کہا ہے کہ قاضی فائز عیسیٰ 25 اکتوبر تک چیف جسٹس آف پاکستان ہیں۔ اسلام آباد میں آل پاکستان لائرز کنونشن کے اختتام پر وفاقی وزیر قانون نے صحافیوں سے گفتگو کی اور کہا کہ واضح کرچکا ہوں کہ 25 اکتوبر تک قاضی فائز عیسیٰ چیف جسٹس پاکستان ہیں، 26 اکتوبر کو سپریم کورٹ کے سینیئر ترین جج چیف جسٹس بن جائیں گے۔

انہوں نے مزید کہا کہ جو بھی ڈرافٹ بنے گا، اس پر پارلیمان کے اندر بھی اتفاق رائے کی کوشش کریں گے، مجوزہ ڈرافٹ میں کچھ چیزیں مزید بہتر ہونے والی ہیں۔ سینیٹر اعظم نذیر تارڑ نے یہ بھی کہا کہ بانی تحریک انصاف کے میثاق جمہوریت پر دستخط ہیں، انہوں نے 18 برس میں کبھی نہیں کہا کہ آئینی عدالت نہیں بننی چاہیئے۔ وفاقی وزیر قانون کا کہنا تھا کہ ججز کے تقرر اور احتساب کا نظام شفاف ہونا چاہیئے، اعلیٰ عدلیہ کو لوگوں کی امنگوں کے مطابق ڈیلیور کرنا چاہیئے۔

خبر کا کوڈ: 1160881