Lavrov: Sanksiyalar Rusiya xalqının iradəsini qıra bilməyəcək

SəhərAzəri-nin məlumatına əsasən, Sergey Lavrov deyib: "Sanksiyalar tarixi həqiqəti müdafiə etmək və qanuni maraqlarını qorumaq niyyətində olan Rusiya xalqının iradəsini qıra bilməyəcək. Heç bir cəza Rusiya Federasiyasının qanuni maraqlarını müdafiə etməyə və sərhədlərimizdə birbaşa təhlükələrin yaranmasının qarşısını almağa yönəlmiş iradəsini qıra bilməz". 
Onun sözlərinə görə, hazırda dünyanın taleyi və onun birqütblü olub-olmayacağı müəyyənləşdirilir. Lavrov bildirib ki, Rusiya dünya ölkələrinin böyük əksəriyyəti ilə birlikdə ədalətli dünya nizamının tərəfdarıdır.
Lavrov əlavə edib ki, Rusiyanın bütün səyləri amerikalıların uydurduğu və hamıya tətbiq etdiyi qaydalar kimi bəzi saxta konstruksiyalara deyil, İkinci Dünya Müharibəsi nəticəsində yaradılmış BMT Nizamnaməsinə əsaslanır.
XİN rəhbəri bildirib ki, Qərb nasizmi hər cür ağartmağa, müasir Avropada nasist təzahürlərini təşviq etməyə çalışır.
"Tariximizin şanlı səhifələrini indi Qərb bizdən qoparmağa, bütün görülən işlərin üstündən xətt çəkməyə çalışır. Sadəcə nasizm üzərində qalib gələnləri cinayətkarlarla eyniləşdirməyə çalışmırlar, həm də bizi bu müharibənin əsas günahkarına çevirməyə və nasizmi hər cür ağartmağa, müasir Avropada nasist təzahürlərini təşviq etməyə çalışırlar", - deyə nazir bildirib.
Onun sözlərinə görə, Rusiyaya və ruslara qarşı təbliğat müharibəsi başlanıb ki, bu da irqçilik və ayrı-seçkiliyin təzahürüdür, bu indi absurd həddə çatdırılır.
Bu arada Rusiya Xarici İşlər Nazirliyinin İnformasiya və Mətbuat Departamentinin direktor müavini Aleksey Zaytsev deyib ki, Rusiyanın Ukraynada nüvə silahından istifadə etməsi qeyri-mümkündür, çünki bu, xüsusi hərbi əməliyyatın tapşırıqları ilə uyğun gəlmir.
Onun dediyinə görə, nüvə silahından mümkün istifadəmizin ssenariləri Rusiyanın doktrinal sənədlərində aydın şəkildə yazılıb. Onlar Ukraynada keçirilən xüsusi hərbi əməliyyat zamanı qarşıya qoyulan vəzifələrin həyata keçirilməsinə aid edilmir”, - deyə Zaytsev vurğulayıb.