اسلام ٹائمز - ایمان؛ محور مقاومت کی کامیابی کا راز

دین و دنیا پروگرام اسلام ٹائمز کی ویب سائٹ پر ہر جمعہ نشر کیا جاتا ہے، اس پروگرام میں مختلف دینی و مذہبی موضوعات کو خصوصاً امام و رہبر کی نگاہ سے، مختلف ماہرین کے ساتھ گفتگو کی صورت میں پیش کیا جاتا ہے۔ ناظرین کی قیمتی آراء اور مفید مشوروں کا انتظار رہتا ہے۔

ہفتہ وار پرگرام دین و دُنیا
عنوان: ایمان؛ محور مقاومت کی کامیابی کا راز
مہمان: حجة الاسلام والمسلمین عون علوی
میزبان:علامہ محمد سبطین علوی
تاریخ: 18 اکتوبر 2024

موضوعات گفتگو:
▪️دو تہذیبوں اور آئیڈیالوجی کی جنگ، محور مقاومت اور دنیائے استکبار
▪️ایمان محور مقاومت کی اساس اور بنیاد
▪️شہدائے مقاومت کامیابی کا سنگ میل
خلاصہ گفتگو:
دو تہذیبوں اور آئیڈیالوجی کی جنگ، محور مقاومت اور دنیائے استکبار:

محور مقاومت اور دنیائے استکبار کے درمیان جاری جنگ تہذیبی اور فکری جنگ ہے، جو دو مختلف آئیڈیالوجیز کی نمائندگی کرتی ہیں۔ محور مقاومت، جس کی قیادت انقلاب اسلامی اور اسلامی تحریکات کرتی ہیں، ایمان، انصاف، آزادی اور خودمختاری پر مبنی ہے۔ یہ نظریہ ظلم اور استکبار کے خلاف عوامی مزاحمت کو فروغ دیتا ہے، جہاں فلسطین، لبنان اور دیگر مزاحمتی گروہ اپنی آزادی اور خودمختاری کے لیے جدو جہد کر رہے ہیں۔ اس کے برخلاف، دنیائے استکبار مغربی سرمایہ داری اور تسلط پسندانہ پالیسیوں کا نمائندہ ہے، جو اپنی مادی طاقت اور سیاسی تسلط کے ذریعے دنیا کے مختلف حصوں میں اپنا غلبہ قائم کرنا چاہتی ہے۔

ایمان محور مقاومت کی اساس اور بنیاد:

ایمان محور مقاومت کی سب سے بڑی طاقت ہے۔ اس میں شامل گروہ اور ممالک، جیسے فلسطین، حزب اللہ لبنان، عراق اور ایران، کی مزاحمت کی بنیاد ایمان اور عقیدہ ہیں۔ یہ ایمان انہیں مشکلات کے باوجود مضبوط رکھتا ہے اور دشمن کے مقابلے میں استقامت فراہم کرتا ہے۔ آیت اللہ خامنہ ای کے مطابق، ایمان ایک ایسا عنصر ہے جو دشمن کی طاقت اور خوف سے بالاتر ہوتا ہے اور آخر کار کامیابی کا باعث بنتا ہے۔

شہدائے مقاومت کامیابی کا سنگ میل:
شہداء محور مقاومت کی تاریخ میں اہم سنگ میل ہیں۔ ان شہداء کی قربانیاں ملتوں کو مزید تقویت فراہم کرتی ہیں اور ان کے ایمان اور عزم کو مضبوط کرتی ہیں۔ شہداء کے خون نے مقاومت کے محاذ کو زندہ رکھا اور عالمی سطح پر استکبار کے خلاف جدوجہد کی راہ ہموار کی۔ سید حسن نصر اللہ اور فلسطینی رہنماؤں نے بارہا اس بات کی تاکید کی ہے کہ شہداء کی قربانیاں استکبار کی طاقت کو شکست دینے کا ذریعہ بنتی ہیں۔

#DENODUNIA #SIBTAILALVI #ITIMESTV