اسلام ٹائمز - جب تک قبضہ اور جبر رہے گا، مزاحمت بھی جاری رہے گی، جواد ظریف

اگر ہمیں جوہری ہتھیار بنانا ہوتے تو بہت پہلے بنا سکتے تھے

جب تک قبضہ اور جبر رہے گا، مزاحمت بھی جاری رہے گی، جواد ظریف

امید ہے کہ اس بار ٹرمپ دور زیادہ سنجیدہ، مرکوز اور زیادہ حقیقت پسندانہ ہوگا

ڈیووس میں عالمی اقتصادی فورم میں گفتگو کرتے ہوئے ایران کے نائب صدر برائے اسٹریٹجک امور کا کہنا تھا کہ ایران دنیا کے لیے خطرہ نہیں، کچھ لوگ ایران کو ایسا ہی مشہور کرنا چاہتے ہیں، نسل کشی منصوبوں کے لیے ایرانو فوبیا اور اسلامو فوبیا جیسے ہتھیاروں کو استعمال کیا جاتا ہے۔

اسلام ٹائمز۔ اسلامی جمہوریہ ایران کے نائب صدر برائے اسٹریٹجک امور محمد جواد ظریف نے کہا ہے کہ مزاحمت تب تک رہے گی، جب تک قبضہ اور جبر رہے گا۔ ڈیووس میں عالمی اقتصادی فورم میں گفتگو کرتے ہوئے جواد ظریف نے کہا اسرائیلی جبر و ظلم کے خلاف مزاحمت ایرانی انقلاب سے پہلے سے جاری ہے، کوئی بھی ایران کو اپنی خواہشات پوری کرنے کے لیے آسان جگہ نہ سمجھے۔ جواد ظریف جو ایران کے سابق وزیر خارجہ رہے ہیں، انہوں نے کہا ہم دھمکیوں پر نہیں مواقعوں کی بنیاد پر آگے بڑھ سکتے ہیں، اگر ہمیں جوہری ہتھیار بنانا ہوتے تو بہت پہلے بنا سکتے تھے۔ انھوں نے کہا کہ ہمارا جوہری پروگرام جوہری ہتھیار بنانے کے لیے نہیں۔ آپ جوہری ہتھیار خفیہ لیبارٹریوں میں بناتے ہیں، جو بین الاقوامی معائنے کے تابع نہیں۔

جواد ظریف نے کہا کہ ایران دنیا کے لیے خطرہ نہیں، کچھ لوگ ایران کو ایسا ہی مشہور کرنا چاہتے ہیں، نسل کشی منصوبوں کے لیے ایرانو فوبیا اور اسلامو فوبیا جیسے ہتھیاروں کو استعمال کیا جاتا ہے۔ انھوں نے کہا امید ہے کہ اس بار ٹرمپ دور زیادہ سنجیدہ، مرکوز اور زیادہ حقیقت پسندانہ ہوگا، ٹرمپ نے کہا تھا کہ ایرانی جوہری معاہدے سے اسرائیل کے لیے نکلے تھے، اب ٹرمپ نے کہا ہے کہ وہ کسی دوسرے ملک کے لیے کچھ نہیں کریں گے۔ جواد ظریف نے کہا کہ معاہدے سے دستبرداری کے بعد ایران نے بہت زیادہ جوہری صلاحیتیں حاصل کر لی ہیں۔